Чарговая праверка апавяшчэння насельніцтва пройдзе ў Брэсцкай вобласці 14 кастрычніка, у Гомельскай — 14–16 кастрычніка

13 кастрычніка, Позірк. Чарговая тэхнічная праверка сістэмы апавяшчэння насельніцтва пройдзе ў Брэсцкай вобласці 14 кастрычніка ў 13:00–14:00, паведамляе прэс-служба Міністэрства па надзвычайных сітуацыях.

У Гомельскай вобласці сістэму будуць правяраць “на працягу двух дзён з 14 па 16 кастрычніка”.

“У ходзе праверкі будуць уключацца электрасірэны. Просім грамадзян захоўваць спакой, ніякіх дзеянняў не патрабуецца”, — папярэдзіла МНС.

Для Брэсцкай вобласці, якая мяжуе з Украінай і Польшчай, гэта стане 11-й ад пачатку года праверкай сістэмы апавяшчэння. Раней яе правяралі 23 і 9 верасня, 12 жніўня, 21 і 8 ліпеня, 30 і 10 чэрвеня, 27 траўня, 22 і 8 красавіка.

У Гомельскай вобласці, якая мяжуе з Украінай і Расіяй, будучая праверка стане сёмай у 2025 годзе — пасля 18 верасня, 21 жніўня, 17 ліпеня, 19 чэрвеня, 20 сакавіка і 30 студзеня.

25 верасня першая ад пачатку года праверка прайшла ў Гродзенскай вобласці. У Мінскай вобласці праверкі праходзілі 10 верасня, 13 жніўня, 11 чэрвеня і 16 красавіка, у Віцебскай — 17 чэрвеня, у Магілёўскай — 18 верасня, у самім Магілёве сістэма тэставалася 15–17 красавіка.

13 сакавіка планавая праверка сістэмы апавяшчэння прайшла па ўсёй Беларусі.

Такім чынам, часцей за ўсё праверкі праводзяцца ў абласцях, якія мяжуюць з Украінай, куды рэгулярна ўрываюцца беспілотныя лятучыя апараты, якія, як мяркуецца, належаць Расіі.

У Беларусі зафіксавана некалькі выпадкаў падзення дронаў на будынкі (у тым ліку ў Мінску), аднак інфармацыі пра тое, што пры гэтым актывавалася сістэма апавяшчэння, няма.

Ад пачатку поўнамаштабнай вайны РФ супраць Украіны праверкі сістэм апавяшчэння сістэматычна праходзяць, напрыклад, у Літве, Польшчы, Чэхіі. Для гэтага выкарыстоўваюцца рэпрадуктары на вуліцах, праз якія перадаецца паведамленне і гучыць сірэна.