Жыхары беларускіх гарадоў пасля 2014 года сталі менш знаходзіць агульнага паміж народамі Беларусі і Расіі — даследаванне
10 кастрычніка, Позірк. Жыхары беларускіх гарадоў пасля 2014 года сталі менш знаходзіць агульнага паміж народамі Беларусі і Расіі, сведчаць вынікі даследавання, праведзенага ў верасні 2025 года экспертнай ініцыятывай iSANS.
Працэнт згадак знізіўся па васьмі з дзевяці прапанаваных аб’яднальных пасылаў (можна было выбіраць любую колькасць варыянтаў).
Доля тых, хто лічыць, што найбольш два народы аб’ядноўвае агульнае мінулае, за 11 гадоў скарацілася з 55% да 37%, агульнасць мовы — з 37% да 26%, культура (каштоўнасці, традыцыі, звычаі) — з 35% да 25%, роднасныя сувязі, міжэтнічныя шлюбы — з 24% да 22%, супрацьстаянне знешнім пагрозам, забеспячэнне бяспекі — з 23% да 18%, рысы характару, менталітэт — з 18% да 17%, рэлігія — з 14% да 10%, прыналежнасць да адзінай еўразійскай цывілізацыі — з 9% да 7%.
Рост назіраецца толькі па пункце “эканамічныя, палітычныя і іншыя агульныя інтарэсы” — з 24% да 29%.
Паводле меркавання 6% удзельнікаў апытання, у беларускага і расійскага народаў няма нічога, што іх яднае (рост у 3 разы за 11 гадоў).
Доля тых, хто не змог адказаць, склала 13% супраць 3%.
Апытанне праводзілася на двух анлайн-панэлях з 5 па 23 верасня 2025 года, у ім удзельнічала 1.496 чалавек. Арганізатары заяўляюць, што выбарка “адпавядае структуры гарадскіх жыхароў Беларусі ва ўзросце ад 18 да 65 гадоў і скарэктавана паводле полу, узросту і рэгіёна пражывання”. 14,2% удзельнікаў не прайшлі ўвесь апытальны ліст (dropoff rate).
