У жыхара Мядзельскага раёна канфіскавана 15 пнеўматычных вінтовак і шэсць пісталетаў

10 кастрычніка, Позірк. Аб канфіскацыі 21 адзінкі зброі ў 47-гадовага жыхара Мядзельскага раёна (Мінская вобласць) паведаміла 10 кастрычніка прэс-служба Міністэрства ўнутраных спраў.

Канфіскацыя праведзеная “падчас правядзення спецыяльнага комплекснага мерапрыемства “Арсенал”, адзначае ведамства.

“Пры аглядзе жылля мужчыны выяўлена і канфіскавана 15 пнеўматычных вінтовак і шэсць пісталетаў. Прызначаны шэраг экспертыз. Дзеянням фігуранта будзе дадзеная прававая ацэнка”, — заявілі ў МУС.

Паведамляецца, што “за незаконныя дзеянні ў дачыненні да агнястрэльнай зброі, боепрыпасаў і выбуховых рэчываў пагражае пакаранне аж да 12 гадоў пазбаўлення волі”. “Асобы, якія добраахвотна здалі зброю і боепрыпасы, што незаконна захоўваюцца ў іх, незалежна ад часу правядзення спецыяльных мерапрыемстваў, вызваляюцца ад крымінальнай адказнасці”, — падкрэслілі ў ведамстве.

6 кастрычніка ў МУС паведамілі, што за захоўванне і збыт зброі затрыманыя двое пажылых жыхароў Магілёўскай вобласці.

Паводле сцвярджэння ведамства, 68-гадовы мужчына “незаконна прадаў пісталет Макарава свайму знаёмаму”. Следчыя распачалі па гэтым факце крымінальную справу. Падчас разбіральніцтва высветлілася, што 71-гадовы пакупнік “займаўся аналагічнай супрацьпраўнай дзейнасцю”.

Падчас вобшукаў у фігурантаў знойдзена і вынята шэсць пісталетаў, рэвальвер, пісталет-кулямёт, ручная асколачная граната, трацілавая шашка, складныя часткі зброі, больш за 800 боепрыпасаў.

Як паведамляў “Позірк”, 6–10 кастрычніка ў Беларусі праходзіць чарговы этап аперацыі “Арсенал”, скіраваны на “прадухіленне парушэнняў заканадаўства ў сферы абароту зброі”. Тыя, хто добраахвотна здаў зброю і боепрыпасы, вызваляюцца ад крымінальнай і адміністрацыйнай адказнасці.

Паводле даных МУС, ад пачатку 2025 года да 3 кастрычніка з абароту вынята больш як 480 адзінак незарэгістраванай зброі і амаль 53 тыс. розных боепрыпасаў.

Добраахвотна здадзена больш за 300 адзінак зброі і каля 19 тыс. боепрыпасаў.