Супрацоўнікаў Гродзенскага дзяржуніверсітэта сабралі для стральбы са зброі і кіравання дронамі
9 кастрычніка, Позірк. Чарговы факт мілітарызацыі беларускай адукацыі зафіксаваны ў Гродзенскім дзяржаўным універсітэце імя Янкі Купалы.
9 кастрычніка, як паведамляе сайт ВНУ, вайсковы факультэт “сабраў 12 каманд, якія складаюцца з супрацоўнікаў Купалаўскага ўніверсітэта, для ўдзелу ў вайскова-патрыятычным злёце“ пад назвай “Сіла ў адзінстве“.
У звароце да ўдзельнікаў прарэктар па навуковай рабоце Наталля Башун “адзначыла важнасць правядзення ваенна-патрыятычных мерапрыемстваў не толькі сярод студэнтаў, але і супрацоўнікаў“.
“Купалаўцам неабходна было прайсці пяць выпрабаванняў. У конкурсе “Зброевы майстар” удзельнікі дэманстравалі навыкі валодання аўтаматам АК-74. Дакладнасць стральбы з пісталета Макарава правяралася ў спаборніцтве “Трапны стралок”. “Тактычная стральба” дазволіла адпрацаваць навыкі паражэння цэляў з аўтамата АК-74 на інтэрактыўным трэнажоры. У конкурсе “Накат” удзельнікі спаборнічалі ў трапнасці стральбы з пнеўматычнага пісталета, выкарыстоўваючы хованкі. Найбольш сучасным і відовішчным стаў конкурс “Баявое пілатаванне БПЛА“, дзе супрацоўнікі ўніверсітэта змаглі адчуць сябе пілотамі дронаў“, — гаворыцца ў паведамленні.
У прэс-рэлізе сцвярджаецца, што злёт “стаў яркай і запамінальнай падзеяй, якая спрыяе ўмацаванню карпаратыўнага духу, развіццю ваенна-прыкладных навыкаў і фарміраванню пачуцця патрыятызму сярод супрацоўнікаў Гродзенскага дзяржаўнага ўніверсітэта імя Янкі Купалы“.
У апошнія гады пад падставай абароны ад знешніх ворагаў і неабходнасці выхавання патрыётаў (у разуменні ўладаў гэта лаяльныя і паслухмяныя ёй грамадзяне) беларуская адукацыя ўслед за расійскай усё больш мілітарызуецца.
Гл. па тэме:
У ваенна-патрыятычных клубах дзяцей вучаць страляць, ім прышчапляюць ідэалогію “рускага свету”, у гэта ўкладваюцца сотні тысяч долараў — БРЦ (калі спасылка не працуе, карыстайцеся, калі ласка, гэтай)
Темные времена. Белорусское образование пропитывается казарменно-тюремным духом (на рускай мове)
