Еўрапарламент заклікаў Савет ЕС уніфікаваць санкцыі ў дачыненні да Беларусі і РФ

9 кастрычніка, Позірк. “Захаваць і пашырыць сваю палітыку санкцый супраць Расіі і прымяніць аналагічную палітыку санкцый да ўсіх дзяржаў, якія падтрымліваюць яе, уключаючы Беларусь, Іран і Паўночную Карэю”, заклікалі дэпутаты Еўрапарламента Савет ЕС у рэзалюцыі “Сумесны адказ на нядаўнія парушэнні Расіяй паветранай прасторы і крытычнай інфраструктуры дзяржаў”.

Еўрапарламент таксама заклікаў “умацаваць усходнюю мяжу ЕС у святле пастаяннага ціску, які аказваецца Расіяй і Беларуссю на знешнія межы Саюза з дапамогай інструменталізацыі міграцыі, з тым каб забяспечыць хуткую і гнуткую падтрымку дзяржавам-членам шляхам устаранення любых тэхналагічных і аператыўных прабелаў па меры іх узнікнення, няхай гэта будзе ў паветры”.

У прэамбуле да тэксту рэзалюцыі гаворыцца, што “28 ліпеня 2025 года расейскі беспілотнік, які перавозіў выбуховыя рэчывы, пракраўся ў паветраную прастору Літвы з тэрыторыі Беларусі і разбіўся на яе тэрыторыі на ваенным палігоне“, а “4 кастрычніка <…> метэаралагічныя шары, якія выкарыстоўваюцца для кантрабанды, праніклі ў паветраную прастору Літвы з тэрыторыі Беларусі, што сур’ёзна перашкодзіла рабоце міжнароднага аэрапорта Вільнюса”.

Намеснік кіраўніка Аб’яднанага пераходнага кабінета Павел Латушка падчас слуханняў аб дзейнасці АПК у Каардынацыйнай радзе 8 жніўня ў Варшаве заявіў, што на той момант пад санкцыямі Еўрасаюза знаходзілася 312 фізічных і 47 юрыдычных асоб, звязаных з афіцыйным Мінскам.

“Сукупна на сёння мы маем 14 пакетаў эканамічных, персанальных або змешаных санкцый ЕС супраць рэжыму Лукашэнкі, прынятых з 2020 па 2025 год”, — удакладніў ён.

Таксама Мінск згадваецца ў санкцыйных пакетах ЕС супраць РФ, якіх на сёння прынята 18, нагадаў экс-дыпламат.

Апошнія абмежавальныя меры ЕС у дачыненні да Мінска, прынятыя 18 ліпеня, сфакусіраваны на забароне імпарту зброі, кантролі над экспартам і блакіроўцы фінансавых аперацый. Пры гэтым па Беларусі і Расіі прыняты раздзельныя санкцыйныя дакументы.

Мінск падтрымлівае Маскву ў развязанай ёю поўнамаштабнай вайне супраць Украіны.