Былы афганскі афіцэр зазнаў катаванні ў Беларусі пасля спробы трапіць у ЕС, яму ампутавалі руку — СМІ

7 кастрычніка, Позірк. Пры перасячэнні мяжы Беларусі з адной з краін Еўрапейскага саюза былы афіцэр Міністэрства абароны Афганістана Джыхад Махамед Гуль Наваі зазнаў катаванні з боку беларускіх сілавікоў, паведаміў партал reform.news са спасылкай на афганскія СМІ.

Паводле звестак выдання 8am.media, мужчына, які ўцёк ад талібаў у Афганістане, цяпер знаходзіцца ў адной з беларускіх бальніц пад наглядам супрацоўнікаў МУС.

Сцвярджаецца, што “пасля жорсткіх катаванняў і працяглага ўтрымання пад вартай без увагі з боку ўладаў” рука 33-гадовага Наваі “пачарнела ад траўмы і ў выніку была ампутаваная ў бальніцы”.

“Былы афганскі афіцэр, які спрабаваў нелегальна прабрацца ў Еўропу, распавёў, што яго правая рука была ампутаваная па плячо праз жорсткія катаванні і збіццё з боку міліцыі ў Беларусі, аднак некаторыя крыніцы сцвярджаюць, што яго рука была ампутавана праз хваробу”, — паведаміў партал afintl.com.

Адзначаецца, што мужчына жанаты і мае дзвюх дачок.

У публікацыі гаворыцца, што каля трох тыдняў таму афганская дэлегацыя наведала Наваі ў бальніцы і “забяспечыла яго ўсім неабходным для лячэння”. Пасля гэтага амбасада Афганістана ў Маскве “атрымала даручэнне” як мага хутчэй даставіць Наваі на радзіму.

24 жніўня паведамлялася, што дэлегацыя амбасады Афганістана ў Маскве наведала грамадзян краіны, якія адбываюць турэмныя тэрміны ў Беларусі. Асноўнай мэтай называлася “ацэнка ўмоў утрымання афганскіх зняволеных і вывучэнне магчымасцей іх рэпатрыяцыі ў Афганістан”, адзначала тэлекампанія Ariana News.

Дэлегацыю ўзначаліў Хафез Абдула Ясір, які, паводле звестак МЗС РФ, займае пасаду першага сакратара дыпмісіі.

Паведамлялася пра сустрэчы з “шэрагам беларускіх афіцыйных асоб”.

Амбасада ў Маскве “падкрэсліла важнасць міжнароднага супрацоўніцтва ў вырашэнні цяжкага становішча афганскіх грамадзян за мяжой” і “выказала падзяку беларускім уладам за іх гатоўнасць да дыялогу і супрацоўніцтву ў вырашэнні праблем”.

Колькасць афганскіх зняволеных у Беларусі, а таксама прычыны іх пераследу не называліся.

Беларускі бок пра сустрэчы не паведамляў.

Другое праўленне талібаў пачалося ў 2021 годзе пасля вываду з Афганістана ваеннага кантынгенту ЗША.

“Талібан” — ісламісцкі рэлігійна-палітычны ваенізаваны рух. Прызнаны тэрарыстычнай арганізацыяй у Таджыкістане, Турцыі, Канадзе.

Беларускія ўлады рэгулярна паведамляюць пра пакуты, фізічныя траўмы і гібель замежнікаў на мяжы з краінамі ЕС, нязменна ўскладаючы адказнасць за гэта на супрацоўнікаў сілавых ведамстваў Польшчы, Літвы і Латвіі. Пры гэтым беларускі бок не тлумачыць, якім чынам мігранты аказваюцца на мяжы з краінамі ЕС у зоне адказнасці памежнага ведамства.

Міграцыйны крызіс на мяжы Беларусі і краін ЕС працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

Аляксандр Лукашэнка неаднаразова заяўляў, што беларускія памежнікі не будуць спыняць нелегальных мігрантаў, якія ідуць у Еўрасаюз праз Беларусь, таму што іх туды нібыта паклікалі.