Пракуратура знайшла парушэнні ў 83% правераных сельскіх магазінаў Гомельскай вобласці

7 кастрычніка, Позірк. У 68 з 82 гандлёвых кропак (82,93%) у сельскай мясцовасці Гомельскай вобласці выяўленыя парушэнні санітарна-эпідэміялагічных норм і патрабаванняў пажарнай бяспекі па выніках праверкі, праведзенай у жніўні — верасні, паведамляе Генеральная пракуратура.

У прыватнасці, выяўленыя шматлікія факты рэалізацыі харчовай прадукцыі са скончанымі тэрмінамі прыдатнасці.

Ведамства прыводзіць у якасці прыкладу магазін у аграгарадку Ударнае Лельчыцкага раёна, дзе ў продажы былі знойдзеныя 24 кускі сметанковага масла, тэрмін прыдатнасці якога скончыўся ў траўні 2025 года.

Заяўляецца, што на скорапсавальнай прадукцыі ў гэтай краме адсутнічалі дата і час ускрыцця спажывецкага пакавання, у выніку чаго тэрмін прыдатнасці такога тавару пакупніку праверыць немагчыма.

У краме вёскі Міроненкі Калінкавіцкага раёна прадавалі замарожаныя субпрадукты, тэрмін прыдатнасці якіх скончыўся ў сакавіку 2025 года, а таксама “гнілую гародніну і садавіну”, адзначае ведамства.

Усяго рэалізацыя прадукцыі са скончанымі тэрмінамі прыдатнасці выяўленая ў 24 гандлёвых аб’ектах вобласці.

У 23 аб’ектах дапушчаныя парушэнні правілаў захоўвання і рэалізацыі харчовай прадукцыі, у 11 у асартыменце была “агародніна з прыкметамі псавання”. У шэрагу магазінаў адсутнічалі “тавары, прадугледжаныя асартыментным пералікам”, дапушчаны парушэнні патрабаванняў пажарнай бяспекі, а таксама факты рэалізацыі прадукцыі без маркіроўкі.

Паводле вынікаў наглядных мерапрыемстваў органамі пракуратуры ўнесена сем прадстаўленняў і вынесена 17 прадпісанняў, якія змяшчаюць патрабаванні аб ліквідацыі выяўленых парушэнняў. Акрамя таго, накіравана сем даручэнняў аб прыцягненні вінаватых асоб да адміністрацыйнай адказнасці.

Рознічны гандаль у сельскай мясцовасці рэгулярна зазнае крытыку з боку Аляксандра Лукашэнкі, але сітуацыя з гадамі істотна не мяняецца. 26 жніўня на нарадзе аб эфектыўнасці сістэмы рознічнага гандлю ён заявіў пра неабходнасць прыцягнуць гандлёвыя сеткі для абслугоўвання насельніцтва “ў невялікія вёскі, няхай нават неперспектыўныя”.

“Трэба забяспечыць баланс: будуеш прыбытковы бізнес у сталіцы і іншых буйных гарадах — вазьмі на сябе сацыяльную адказнасць па абслугоўванні спажыўца ў вёсцы. Тым больш праблемных раёнаў не так ужо і шмат”, — сказаў Лукашэнка.

Паводле яго слоў, “усе разумныя гандляры рынуліся ў буйныя гарады, пабудавалі тут магазіны, нядрэнна жывуць, праўда, на Блакітным беразе ўсе гаспадары і ўласнікі”. “Ну дык арганізуйце так, каб яны працавалі там, у глыбінцы”, — загадаў ён чыноўнікам, якія прысутнічалі на нарадзе.

5 жніўня Лукашэнка падпісаў указ № 294, накіраваны на “стварэнне дадатковых умоў для развіцця гандлю на тэрыторыі сельскай мясцовасці васьмі раёнаў” — у Браслаўскім, Гарадоцкім, Дубровенскім, Талачынскім і Шаркаўшчынскім раёнах Віцебскай вобласці, Вілейскім раёне Мінскай вобласці, а таксама Касцюковіцкім і Хоцімскім раёнах Магілёўскай вобласці.

Сярод іншага дакумент ускладае персанальную адказнасць на старшыняў выканкамаў гэтых раёнаў і абласцей “за нездавальняючае гандлёвае абслугоўванне насельніцтва”.

Кіраўнікі юрыдычных асоб названых рэгіёнаў будуць асабіста адказваць за “неналежную арганізацыю рознічнага гандлю”.