Мінінфарм забараніў яшчэ 32 кнігі — сярод іх раманы Сашы Філіпенкі і дзіцячыя бэстсэлеры
Саша Філіпенка
30 верасня, Позірк. Спіс друкаваных выданняў, забароненых да распаўсюду на тэрыторыі Беларусі, дапоўнены 32 найменнямі, паведамляе Міністэрства інфармацыі.
Рашэнне прынятае на чарговым пасяджэнні Рэспубліканскай камісіі па правядзенні ацэнкі сімволікі, атрыбутыкі, інфармацыйнай прадукцыі. У кнігах, якія папоўнілі спіс, як сцвярджаецца, “знойдзеная наяўнасць інфармацыйных паведамленняў і матэрыялаў, распаўсюд якіх здольны нанесці шкоду нацыянальным інтарэсам”.
Сярод іншага ў пералік унеслі кнігі беларускага пісьменніка Сашы Філіпенкі “Слон” і “Чырвоны крыж”.
Філіпенка пасля падзей 2020 года стаў адным з галасоў беларускага пратэстнага руху ў Еўропе, дзе ён жыве. Неаднаразова выступаў у абарону беларускіх палітвязняў у расійскай, нямецкай, англійскай, шведскай, галандскай, польскай, французскай прэсе. Падтрымлівае Украіну ў яе барацьбе супраць расійскай агрэсіі.
У ліпені 2023 года ў Вільнюсе адбылася прэм’ера спектакля паводле п’есы Сашы Філіпенкі “Ціхары”. Пастаноўка ў сатырычнай форме паказвае беларускіх сілавікоў, якія пад выглядам звычайных грамадзян прасочваюць удзельнікаў пратэстаў.
У спісе цяпер таксама фігуруе дзіцячы бэстсэлер нямецкага аўтара Вольфа Эрльбруха “Качка, смерць і цюльпан”, а таксама напісаная ў суаўтарстве з Вернерам Хольцвартам кніга “Маленькі крот, які хацеў ведаць, хто нарабіў яму на галаву”.
У 2017 годзе Эрльбрух атрымаў Міжнародную прэмію памяці Астрыд Ліндгрэн, адну з самых прэстыжных узнагарод у галіне дзіцячай літаратуры. Ён з’яўляецца лаўрэатам Медаля Ханса Крысціяна Андэрсана за выдатныя заслугі ў галіне дзіцячай літаратуры.
У забаронным спісе з’явілася некалькі кніг Ірвіна Уэлша — шатландскага пісьменніка, вядомага рэзкім, прамым стылем і выкарыстаннем дыялектаў. Яго кнігі даследуюць цёмныя бакі жыцця: наркотыкі, гвалт, секс і сацыяльныя праблемы сучаснай моладзі.
Уключаны ў пералік раман Уэлша “На іголцы” быў у спісе 200 лепшых кніг па версіі “Бі-бі-сі” ў 2003 годзе.
Мінінфарм адзначае, што ў выпадку выяўлення фактаў распаўсюду друкаваных выданняў, уключаных у вышэйназваны спіс, ведамства мае права спыніць дзеянне пасведчання аб дзяржаўнай рэгістрацыі ў якасці распаўсюджвальніка друкаваных выданняў.
Цяпер у Беларусі забароненыя 173 кнігі.
