Польшча ўвяла санкцыі супраць прадстаўніцтва Беларускай цэментнай кампаніі
29 верасня, Позірк. Зарэгістраванае ў траўні 2020 года ў Варшаве прадстаўніцтва беларускай цэментнай кампаніі (БЦК) у Польшчы “BKC-Polska Sp. z o. o” ўнесенае ў санкцыйны спіс польскага Міністэрства ўнутраных спраў і адміністрацыі. Пра гэта паведаміла Нацыянальная падатковая адміністрацыя (НПА) Польшчы.
Паводле інфармацыі НПА, прадстаўніцтва “афіляванае з холдынгам “Беларуская цэментная кампанія”, галаўны офіс якога знаходзіцца ў Мінску. Статутны капітал прадстаўніцтва складае 43.000 злотых (каля 11,8 тыс. долараў па бягучым курсе), а адзіным акцыянерам, з’яўляецца дзяржаўнае прадпрыемства “Кіруючая кампанія холдынгу БЦК”.
Бенефіцыярным уладальнікам кампаніі, зарэгістраванай у Польшчы, называецца грамадзянін Беларусі, які таксама з’яўляецца кіруючым дырэктарам беларускага прадпрыемства.
НПА адзначае, што прадстаўніцтва ў Польшчы ўключанае ў польскі санкцыйны спіс услед за сваёй галаўной арганізацыяй, якая папоўніла яго 22 ліпеня 2025 года.
Тады паведамлялася, што холдынг “Беларуская цэментная кампанія” з’яўляўся буйным пастаўшчыком цэменту ў Польшчу, у 2022 годзе ажыццявіў пастаўкі на 160 млн злотых (каля 44,4 млн долараў па курсе на момант увядзення санкцый).
Акрамя цэменту, кампанія экспартавала ў Польшчу негашаную і гашаную вапну, а таксама сценавыя блокі. Адзначалася, што тавары закуплялі некалькі юрыдычных асоб, у тым ліку даччынае прадпрыемства БЦК, размешчанае ў Варшаве, якое і трапіла цяпер пад санкцыі.
НПА адзначыла, што развіццё гандлёвых адносін холдынгу з Расійскай Федэрацыяй прывяло да ўключэння беларускага прадпрыемства ў санкцыйны спіс ЗША ў снежні 2023 года. “Прадпрыемства цесна супрацоўнічае і пастаянна пашырае супрацоўніцтва з іншымі суб’ектамі Расійскай Федэрацыі, пастаўляючы тавары, якія ўносяць істотны ўклад у паляпшэнне функцыянавання абаронна-арыентаванай эканомікі. Падобныя дзеянні прыводзяць да нарошчвання вайсковага патэнцыялу для працягу агрэсіі супраць Украіны”, — гаварылася ў паведамленні.
Адзначалася, што ўключэнне ў польскі санкцыйны спіс цягне за сабой замарожванне ўсіх фінансавых сродкаў і эканамічных рэсурсаў і забарону на іх выдаванне, выключэнне з працэдуры дзяржаўных закупак або конкурсаў.
Паводле звестак НПА, цяпер у польскім санкцыйным спісе знаходзяцца 24 беларускія арганізацыі.
19 верасня Вярхоўная кантрольная палата Польшчы апублікавала справаздачу, у якой раскрытыкавала бяздзейнасць НПА ў плане кантролю за санкцыямі ў дачыненні да Беларусі і Расіі ў 2022–2023 гадах.
