26 верасня, Позірк. Прагрэс у галіне штучнага інтэлекту (ШІ) адкрывае “неймаверныя перспектывы развіцця практычна па ўсіх напрамках чалавечай жыццядзейнасці”, але ШІ — гэта “праславуты меч аб двух канцах” (double-edged sword), заявіў міністр замежных спраў Беларусі Максім Рыжанкоў 25 верасня ў Нью-Ёрку на дэбатах па гэтай тэме ў Савеце Бяспекі ААН.
Першым з асноўных выклікаў чыноўнік назваў “спробы так званага калектыўнага Захаду выключыць астатнія краіны з працэсаў развіцця і асваення штучнага інтэлекту, мяркуючы, што гэтая тэхналогія дазволіць яму забяспечыць сваю вайсковую і эканамічную перавагу”.
“Па сутнасці, у гэтай галіне ствараецца новая заслона, на гэты раз не ідэалагічная, а тэхналагічная, сіліконавая, які мае падзяліць Захад ды іншы свет, — заявіў Рыжанкоў (на падставе відэазапісу ў неафіцыйным тэлеграм-канале прэс-службы МЗС). — Іншы свет — гэта глабальная большасць. І вярнуць краіны глабальнай большасці ў новы неакаланіялізм”.
Паводле слоў беларускага чыноўніка, для чалавецтва гэта “шлях у нікуды, калі не ў бездань”. Ён перакананы, што ШІ “павінен быць здабыткам для ўсіх краін без выключэння”, толькі ў такім выпадку “гэтая тэхналогія будзе служыць на карысць міру і развіцця”.
Яшчэ адным выклікам Рыжанкоў назваў прымяненне ШІ ў вайсковай вобласці. Ён адзначыў, што “ўзброеныя канфлікты садзейнічаюць апераджальнаму развіццю ваенных тэхналогій”.
“Сучасныя канфлікты — гэта войны беспілотных лятучых апаратаў, высокадакладнай зброі і смяротных аўтаномных сістэм узбраенняў, якія могуць валодаць саманавучальнай функцыяй, уласцівай штучнаму інтэлекту, — заявіў кіраўнік МЗС. — Маецца рэальная рызыка, што алгарытмы штучнага інтэлекту ў сістэмах узбраенняў на пэўным этапе стануць самастойна прымаць рашэнні. На гэты конт знята нямала тэхнатрылераў — ад ваенных гульняў, калі кампутарная гульня ледзь не прыводзіць да запуску ядзерных ракет, да “Тэрмінатара”, калі сістэма SkyNet вырашае знішчыць чалавецтва”.
Рыжанкоў працытаваў Аляксандра Лукашэнку, на думку якога, бескантрольны ШІ можа загубіць чалавецтва. “Гэта ўсё падводзіць нас да ключавога пытання. Штучны інтэлект павінен быць падкантрольным чалавеку”, — сказаў міністр.
Кіраўнік беларускага МЗС лічыць, што распрацоўка ШІ павінна быць скіраваная на “паляпшэнне жыцця чалавека і захаванне яго годнасці”. Такім чынам, адзначыў ён, тэхналогіі ШІ “павінны дапаўняць чалавечыя здольнасці, а не замяняць іх цалкам”, не павінны “дыскрымінаваць чалавека”.
“Неабдуманае прымяненне штучнага інтэлекту можа мець сур’ёзныя сацыяльныя наступствы, — лічыць Рыжанкоў. — У сувязі з гэтым павінны быць дакладна вызначаныя механізмы адказнасці за рашэнні, якія прымаюцца штучным інтэлектам. Правільным крокам у гэтым напрамку разглядаем нядаўнюю ініцыятыву Кітая пра стварэнне сусветнай арганізацыі супрацы ў галіне штучнага інтэлекту, якую Беларусь цалкам падтрымлівае”.
“Нам усім надзвычай неабходна такая пляцоўка — і наколькі магчыма хутчэй — для выпрацоўкі і ўзгаднення механізмаў агульнага кантролю за працэсамі развіцця штучнага інтэлекту”, — дадаў міністр.
