У Беларусь прыбыў член палітбюро Кампартыі КНР, візіт прадоўжыцца да 24 верасня

21 верасня, Позірк. З візітам у Беларусь прыбыў увечары 20 верасня член пастаяннага камітэта палітбюро цэнтральнага камітэта Камуністычнай партыі Кітая, сакратар цэнтральнай камісіі па праверцы дысцыпліны КПК Лі Сі.

Па прылёце ў мінскім аэрапорце адбыліся “кароткія перамовы” Лі Сі з кіраўніком адміністрацыі Аляксандра Лукашэнкі Дзмітрыем Крутым, паведамляе дзяржагенцтва БелТА.

Візіт Лі Сі ў Беларусь анансавала 15 верасня кітайскае інфармагенцтва “Сіньхуа”. Адзначалася, што функцыянер КПК “будзе знаходзіцца ў Грэцыі і Беларусі з афіцыйнымі візітамі добрай волі ў перыяд з 17 па 24 верасня”.

Напярэдадні агенцтва паведаміла аб завяршэнні чатырохдзённага візіту Лі Сі ў Грэцыю.

Польшча закрыла ўсе кантрольна-прапускныя пункты на мяжы з Беларуссю, уключаючы адзіны дзейны легкавы аўтамабіль КПП Цярэспаль (Брэст), 12 верасня — у першы дзень беларуска-расійскіх стратэгічных вучэнняў “Захад-2025”, якія і паслужылі падставай для такога рашэння. У апошні дзень манеўраў, 16 верасня, стала вядома, што Варшава пакуль не адкрые мяжу.

Польскія ўлады паведамілі, што рашэнне аб закрыцці мяжы “дзейнічае да далейшага паведамлення і прадыктаваная клопатам пра бяспеку грамадзян Польшчы”.

На перамовах з міністрам замежных спраў Кітая Ван І 15 верасня абмяркоўвалася пытанне закрытай з ініцыятывы Польшчы мяжы з Беларуссю, паведаміў кіраўнік польскага МЗС Радаслаў Сікорскі 18 верасня.

Таксама падчас візіту ў Польшчу Ван І правёў сустрэчу з прэзідэнтам краіны Каралем Наўроцкім.

Мяжа Беларусі з Польшчай выкарыстоўваецца Кітаем для транзіту сваіх тавараў у краіны Еўрасаюза. 24 чэрвеня 2024 года тагачасны прэзідэнт Польшчы Анджэй Дуда абмеркаваў у Пекіне з лідэрам КНР Сі Цзіньпінам крызіс на беларуска-польскай мяжы. Паводле Дуды, “гібрыдная атака” (так ён назваў спробы масавага пранікнення нелегалаў з трэціх краін з тэрыторыі Беларусі), што працягваюцца з вясны 2021 года, на мяжы стала перашкодай для рэалізацыі кітайскай ініцыятывы “Пояс і шлях”.