“Экстрэмісцкім фарміраваннем” прызнаны даследчы цэнтр BEROC

18 верасня, Позірк. “Экстрэмісцкім фарміраваннем” прызнаны даследчы цэнтр BEROC. Адпаведнае рашэнне прыняў Камітэт дзяржбяспекі 15 верасня.

Запіс аб гэтым з’явіўся ў адпаведным пераліку.

Датычнымі да яго названы Павел Данэйка (паказаны як Дайнека. — “Позірк”.), Дзмітрый Крук, Кацярына Барнукова, Анастасія Лузгіна, Радзіён Марозаў і Алег Мазоль.

У структуру “фарміравання” ўключаны акаўнты арганізацыі ў сацсетках і на “Ютубе”.

31 студзеня Мінскі гарадскі суд завочна прыгаварыў адміністрацыйнага дырэктара BEROC, вядомага эканаміста Данэйку да 12 гадоў пазбаўлення волі ва ўмовах узмоцненага рэжыму і пастанавіў спагнаць з яго штраф — 13 тыс. базавых велічынь (546 тыс. рублёў).

Паводле ч. 1 арт. 357 КК (змова або іншыя дзеянні, учыненыя з мэтай захопу дзяржаўнай улады) яго пакаралі дзевяццю гадамі зняволення і штрафам у памеры 10 тыс. б.в. (420 тыс. рублёў); ч. 3 арт. 361¹ (стварэнне экстрэмісцкага фарміравання або ўдзел у ім) — трыма гадамі і штрафам 3 тыс. б.в. (126 тыс. рублёў).

Эканаміст таксама прызнаны вінаватым у “арганізацыі і кіраўніцтве прадпрымальніцкай дзейнасцю, якая ажыццяўляецца без спецыяльнага дазволу (ліцэнзіі), і прадпрымальніцкай дзейнасці, якая ажыццяўляецца без спецыяльнага дазволу (ліцэнзіі), спалучанай з атрыманнем даходу ў асабліва буйным памеры” (ч. 4 арт. 16, ч. 2 арт. 233). За гэта яму прызначаны штраф — 2 тыс. б.в. (84 тыс. рублёў).

BEROC — вядучы незалежны акадэмічны даследчы цэнтр у галіне эканамічных даследаванняў у Беларусі. Праводзіць акадэмічныя і прыкладныя даследаванні, арганізуе адукацыйныя праграмы па сучаснай эканоміцы і ажыццяўляе іншую актуальную дзейнасць.

Пачаў сваю дзейнасць у краіне ў 2008 годзе як сумесны праект Стакгольмскага інстытута пераходных эканомік (SITE) і Эканамічнага адукацыйнага і даследчага кансорцыума (EERC) пры фінансавай падтрымцы Шведскага агенцтва па развіццю (SIDA) і Фонду Еўразія (East Europe Foundation).

Цяпер працуе з-за мяжы.

У красавіку змест сайта і акаўнтаў арганізацыі ў сацсетках атрымаў статус “экстрэмісцкіх матэрыялаў“.