Затрыманая пасля запуску дрона ў Варшаве беларуска вызваленая, яе спадарожніка-ўкраінца дэпартуюць

17 верасня, Позірк. 17-гадовая беларуска, затрыманая разам з 21-гадовым грамадзянінам Украіны 15 верасня за запуск беспілотніка над рэзідэнцыяй прэзідэнта і ўрадавымі будынкамі Польшчы, праходзіла па справе як сведка і была адпушчаная, паведаміў партал rmf24.pl.

Адзначаецца, што ўкраінец пагадзіўся з прад’яўленым абвінавачваннем у парушэнні арт. 212 закона аб авіяцыі за кіраванне дронам у зоне абмежаванага доступу і заплаціў штраф 4 тыс. злотых (крыху больш за 1,1 тыс. долараў).

Таксама пракуратура накіравала ў памежную службу хадайніцтва аб выправаджэнні 21-гадовага мужчыны з краіны, па выніках чаго было прынята рашэнне аб яго дэпартацыі. Украінца даставяць на памежны пераход, дзе ён павінен будзе перасекчы мяжу. Акрамя таго, паводле рашэння суда маладому чалавеку будзе на пяць гадоў забаронены ўезд у Польшчу і іншыя краіны Шэнгенскага пагаднення.

16 верасня стала вядома, што непаўнагадовая грамадзянка Беларусі, затрыманая ў Варшаве за інцыдэнт з беспілотным лятальным апаратам, прыбыла ў Польшчу некалькі дзён таму, а ўкраінец знаходзіўся ў Польшчы восем гадоў.

Раней паведамлялася, што Варшава апавясціла Мінск аб затрыманні беларускі. Як заяўлялася, Мінск разлічваў, што “правы беларускай грамадзянкі будуць абароненыя”.

Грамадзянін Украіны і грамадзянка Беларусі былі затрыманыя 15 верасня каля 19 гадзін за запуск дрона над урадавым кварталам Варшавы.

Паводле слоў намесніка міністра ўнутраных спраў і адміністрацыі Мацея Душчыка, затрыманыя былі дапытаныя ноччу, справу расследуюць паліцыя, пракуратура і спецслужбы.

Ці было тое, што адбылося, выпадковасцю, “высвятляць дзеянні службаў і пракурора”, заявіў Душчык.

“Гэта першы выпадак, калі робат апынуўся непасрэдна над аб’ектамі, якія ахоўваюцца“, — паведаміў прэс-сакратар Службы дзяржаўнай аховы Польшчы Багуслаў Пяркоўскі.

Аб прымусовым прызямленні ў Варшаве беспілотнага лятальнага апарата паведаміў 15 верасня прэм’ер-міністр краіны Дональд Туск.

Паводле яго слоў, БПЛА быў нейтралізаваны супрацоўнікамі Службы дзяржаўнай аховы, дрон лётаў на ўрадавымі будынкамі і рэзідэнцыяй прэзідэнта Польшчы.

“Затрыманыя двое грамадзян Беларусі. Паліцыя расследуе абставіны інцыдэнту”, — адзначыў Туск са спасылкай на першасную інфармацыю спецслужбаў.

Нейтралізацыя беспілотнага лятальнага апарата над урадавымі будынкамі ў Варшаве заняла некалькі хвілін.