17 верасня, Позірк. Дзяржаўны мытны камітэт працягнуў знаходжанне польскіх фур на тэрыторыі Беларусі яшчэ на 10 дзён, паведамляе 17 верасня прэс-служба ведамства.
Сцвярджаецца, што гэта зроблена “зыходзячы з духу добрасуседства, ідучы насустрач польскаму бізнесу”.
“Па віне Польшчы на беларускай тэрыторыі засталося 1.453 грузавыя транспартныя сродкі на польскай рэгістрацыі, якія не паспелі выехаць да закрыцця ўладамі сумежнай краіны мяжы. Іх выезд магчымы толькі праз беларуска-польскі ўчастак мяжы”, — гаворыцца ў рэлізе.
Па гэтых транспартных сродках заканчваецца тэрмін часовага ўвозу на тэрыторыю ЕАЭС, устаноўлены пры ўездзе ў Беларусь: “Беларуская мытня мае права прыцягнуць перавозчыкаў да адказнасці ў рамках заканадаўства”.
Для прадаўжэння тэрміну часовага ўвозу па канкрэтных грузавых аўто перавозчыкам неабходна звярнуцца ў орган мытні, у рэгіёне дзейнасці якога яны знаходзяцца.
“Далейшыя рашэнні” будуць прымацца пасля заканчэння названых 10 дзён, паведамляе ДПК.
На думку ведамства, “польскі бізнес аказаўся заложнікам дзеянняў урада сваёй жа краіны”.
Польшча закрыла ўсе кантрольна-прапускныя пункты на мяжы з Беларуссю, уключаючы адзіны КПП Цярэспаль (Брэст), які выкарыстоўваўся для пропуску легкавых аўтамабіляў, з 0 гадзін па польскім часе (1 гадзіна па мінскім часе) 12 верасня “да адмены рашэння”. Падставай паслужылі сумесныя з РФ ваенныя вучэнні “Захад-2025” на тэрыторыі Беларусі.
Мяжа Беларусі з Польшчай выкарыстоўваецца Кітаем для транзіту сваіх тавараў у краіны Еўрасаюза.
15 верасня ў Варшаве (Польшча) прайшла сустрэча міністраў замежных спраў гэтай краіны і КНР Радаслава Сікорскага і Ван І. Бакі “прызналі выгады ад прадастаўлення ўзаемавыгадных паслуг па перавозцы грузаў чыгуначным, марскім і паветраным транспартам, а таксама ад умацавання маршрутаў і лагістычных ланцужкоў, якія існуюць і патэнцыйных”.
Аб тым, што Польшча не адкрые мяжу з Беларуссю пасля заканчэння беларуска-расійскіх вучэнняў 16 верасня, заявіла Міністэрства ўнутраных спраў і адміністрацыі напярэдадні.
