Еўрапейская федэрацыя журналістаў запатрабавала вызваліць беларускіх медыя-прадстаўнікоў, якія застаюцца ў няволі
12 верасня, Позірк. Еўрапейская федэрацыя журналістаў (ЕФЖ) вітала выхад з беларускіх турмаў 11 верасня 52 палітвязняў, уключаючы 9 журналістаў, і запатрабавала ад уладаў у Мінску неадкладна вызваліць палітычных вязняў, якія застаюцца ў няволі, у тым ліку 27 прадстаўнікоў медыя.
“Мы, безумоўна, рады вызваленню нашых калегаў, несправядліва зняволеных у турму па ілжывых абвінавачваннях, вылучаных рэжымам Лукашэнкі, — заявіла прэзідэнт ЕФЖ Мая Север. — Але мы не можам задаволіцца гэтай паўмерай. Разам з Беларускай асацыяцыяй журналістаў і нашымі польскімі сяброўскімі арганізацыямі мы патрабуем неадкладнага вызвалення 27 журналістаў, якія застаюцца ў зняволенні ў Беларусі, а таксама сотняў іншых невінаватых грамадзян”.
Вызваліць беларускіх журналістаў і спецыялістаў у галіне інфармацыі, якія застаюцца ў няволі (усяго 33 чалавекі) заклікала таксама міжнародная арганізацыя “Рэпарцёры без межаў”.
У пачатку чэрвеня з’езд ЕФЖ, які прайшоў у Будапешце, запатрабаваў ад Мінска неадкладнага вызвалення ўсіх зняволеных журналістаў і заклікаў “усіх міжнародных суб’ектаў аказаць ціск на ўлады Беларусі з мэтай вызвалення зняволеных і спынення рэпрэсій, а таксама спрыяць стварэнню магчымасцяў для працягу дзейнасці незалежных СМІ для беларускага грамадства”.
У ліку 52 палітвязняў, адпушчаных на волю 11 верасня ў рамках здзелкі паміж прэзідэнтам ЗША Дональдам Трампам і Аляксандрам Лукашэнкам, журналісты Вячаслаў Лазараў, Ігар Лосік, Павел Мажэйка, Аляксандр Манцэвіч, Яўген Меркіс, Павел Падабед, Ірына Слаўнікава, Алена Цімашчук і Ларыса Шчыракова.
Усе яны былі вывезены ў Літву. Застаецца невядомым лёс аднаго з лідараў дэмсіл Мікалая Статкевіча, які пасля знаходжання на нейтральнай тэрыторыі сышоў на беларускі бок.
