Мінфін ЗША дазволіў частку аперацый з “Белавія“

11 верасня, Позірк. Упраўленне кантролю за замежнымі актывамі (OFAC) Мінфіна ЗША апублікавала генеральную ліцэнзію, якая дазваляе частку аперацый з адкрытым акцыянерным таварыствам “Белавія“.

У прыватнасці, дазваляюцца ўсе здзелкі, раней забароненыя Палажэннем аб санкцыях у дачыненні да Беларусі, 31 CFR (кодэкс федэральных правілаў) частка 548 (BSR), з удзелам ААТ “Белавія“ або любой арганізацыі, у якой “Белавія“ прама ці ўскосна валодае 50-працэнтнай або больш доляй, за выключэннем названых у пункце b) генеральнай ліцэнзіі.

У гэтым пункце ўдакладняецца, што генеральная ліцэнзія “не дазваляе разблакоўку любой маёмасці, заблакаванай у адпаведнасці з любой часткай 31 CFR (кодэкс федэральных правілаў), раздзел V; або любыя здзелкі, забароненыя BSR (санкцыямі ў дачыненні да Беларусі), уключаючы здзелкі, звязаныя з маёмасцю або долямі ў маёмасці любой асобы, заблакаванай у адпаведнасці з BSR“, акрамя авіякампаніі “Белавія“, “калі гэта не дазволена асобна“.

Народнае антыкрызіснае ўпраўленне Паўла Латушкі, які займаецца тэмай санкцый, заявіла, што амерыканскі бок не зняў санкцыі з “Белавія“, а часткова прыпыніў, “дазволіўшы ўгоды (за выключэннем угод з заблакаванай маёмасцю), шляхам прыняцця адпаведнай генеральнай ліцэнзіі“. “Белавія” “застаецца ў спісе SDN” (Specially Designated Nationals and Blocked Persons list, спіс грамадзян асаблівых катэгорый і заблакаваных асоб).

Пра тое, што ЗША здымаюць санкцыі з “Белавія“, заявіў намеснік спецпасланніка прэзідэнта ЗША ва Украіне Кіта Келога Джон Коўл на сустрэчы з Аляксандрам Лукашэнкам у Мінску 11 верасня.

23 траўня 2021 года ў выніку дзеянняў беларускіх уладаў у мінскім аэрапорце здзейсніў вымушаную пасадку самалёт ірландскай авіякампаніі Ryanair, які ляцеў з Афін у Вільнюс. На борце былі на той момант апазіцыйны блогер Раман Пратасевіч і ягоная сяброўка, расіянка Сафія Сапега. Яны былі затрыманыя, асуджаныя, але пасля памілаваныя.

Пасля інцыдэнту “Белавія” забаронена лятаць у краіны Еўрасаюза. 2 снежня 2021 года Вялікабрытанія, Канада, ЗША і ЕС скаардынавана ўхвалілі чарговыя санкцыі ў дачыненні да шэрагу беларускіх фізічных асоб і арганізацый. Як было адзначана ў сумеснай заяве з гэтай нагоды, санкцыйныя меры прынятыя “ў адказ на працяглыя нападкі на правы чалавека і асноўныя свабоды ў Беларусі, ігнараванне міжнародных нормаў і неаднаразовыя акты рэпрэсій”. Сярод арганізацый, якія трапілі ў “чорны спіс”, значылася і “Белавія”.

2 сакавіка 2022 года, праз тыдзень пасля пачатку поўнамаштабнага расейскага вайсковага ўварвання ва Украіну, ЗША ўвялі ў дачыненні да “Белавія” абмежаванні, якія тычацца экспарту прадукцыі авіяцыйнай сферы і ліцэнзавання пэўных самалётаў і запчастак. З 7 снежня 2023 года яны былі падоўжаныя яшчэ на 180 дзён.

9 жніўня 2023 года “Белавія” была ўключана ў санкцыйныя спісы ЗША.

3 лістапада 2023 года генеральны дырэктар кампаніі Ігар Чаргінец на прэс-канферэнцыі прызнаў, што планы па мадэрнізацыі флоту самалётаў авіякампаніі “Белавія” былі парушаныя з-за ўвядзення заходніх санкцый.

29 траўня 2024 года Еўрапейскі суд агульнай юрысдыкцыі пакінуў у моцы санкцыі Еўрасаюза, уведзеныя супраць “Белавія”, адхіліўшы адпаведны пазоў беларускай авіякампаніі.