Персонай нон грата абвешчаны супрацоўнік беларускай амбасады ў Малдове

10 верасня, Позірк. Міністэрства замежных спраў Малдовы абвясціла персонай нон грата супрацоўніка амбасады Беларусі, ён павінен пакінуць краіну “ў тэрміны, прадугледжаныя дыпламатычнай працэдурай”, паведаміла 10 верасня агенцтва “Малдпрэс” са спасылкай прэс-сакратара знешнепалітычнага ведамства Таццяну Барак.

Агенцтва адзначыла, што МЗС Малдовы “не прадаставіла дадатковых падрабязнасцяў адносна прычын, якія паслужылі падставай для прыняцця такога рашэння”.

Адзначаецца, што “нядаўна ў Румыніі за шпіянаж на карысць Рэспублікі Беларусь быў затрыманы былы намеснік дырэктара Службы разведкі і бяспекі” Малдовы. Верагодна, гаворка пра Аляксандра Балана, затрыманага ў Румыніі 8 верасня і падазраванага ў дзяржаўнай здрадзе, “звязанай з пастаяннай перадачай дзяржаўных сакрэтаў”.

Пра раскрыццё шпіёнскай сеткі Мінска ў выніку сумеснай працы са спецслужбамі Венгрыі і Румыніі паведаміла 8 верасня Служба бяспекі і інфармацыі (контрвыведка) Чэхіі.

8 і 9 верасня стала вядома, што Чэхія і Польшча абвясцілі персонамі нон грата супрацоўнікаў беларускіх дыпмісій.

Чэхія, як паведамлялася, высылае дыпламата Мікалая Дукшту, дарадцы ў адміністрацыйных пытаннях. У адпаведнасці з практыкай, якая склалася ў Беларусі, гэтую пасаду ў амбасадах займаюць людзі, якія камандзіруюцца Камітэтам дзяржбяспекі.

МЗС Беларусі “рашуча асудзіла” падобныя дзеянні Чэхіі і Польшчы, паабяцаўшы прыняць “захады ў адказ”.

У амбасадзе Беларусі ў Малдове дарадцам па адміністрацыйных пытаннях, па ўсёй бачнасці, з’яўляецца Уладзімір Зубкоў альбо іншы супрацоўнік, які змяніў яго.

Згодна з дыпдаведнікам МЗС Малдовы, Зубкоў атрымаў акрэдытацыю ў ліпені 2021 года, пры гэтым, як правіла, дарадцы камандзіруюцца на працу ў беларускія замежныя ўстановы тэрмінам на чатыры гады.

Паводле інфармацыі беларускіх незалежных СМІ, менавіта дарадцу амбасады Зубкова, штатнага супрацоўніка КДБ, нібыта спрабаваў, паводле версіі афіцыйнага Мінска, завербаваць польскі дыпламат, які працуе ў Малдове, у снежні мінулага года.

Амбасадар Беларусі ў Малдове Анатоль Бубен 5 верасня ўручыў даверчыя граматы прэзідэнту краіны Маі Санду.