У тэракце ў Іерусаліме загінуў рабін — выхадзец з Беларусі

8 верасня, Позірк. У выніку тэрарыстычнага акту 8 верасня ў Іерусаліме загінуў 79-гадовы рабін Мардэхай Штэйнцаг, які нарадзіўся і вырас у Беларусі, паведаміў ізраільскі сайт “Юдаізм і яўрэі”.

Адзначаецца, што Штэйнцаг працаваў у Беларусі ўрачом, “дапамагаў спартсменам аднаўляцца пасля траўмаў”.

“Ужо зусім не ў маладым узросце, пераехаўшы ў Ізраіль, ён адкрыў у Бейт Шэмэшы (Іерусалімская акруга) пякарню “арганічнага і здаровага хлеба”.

Раніцай 8 верасня ў Іерусаліме ўчынены тэракт з прымяненнем агнястрэльнай зброі, у выніку якой загінулі шэсць чалавек, 10 атрымалі раненні. Выканаўцы, як паведамляецца, палестынцы, ліквідаваны.

Амбасада Беларусі ў Ізраілі выказала спачуванні сем’ям загінулых і заявіла, што “любыя формы тэрарызму не маюць і не могуць мець апраўдання”.

Абвастрэнне сітуацыі на Блізкім Усходзе працягваецца з 7 кастрычніка 2023 года — маштабнай атакі на Ізраіль руху ХАМАС з тэрыторыі сектара Газа, у выніку якога загінула мноства грамадзянскіх асоб, захоплены заложнікі.

У выніку атакі ў Ізраілі загінула 1,2 тыс. чалавек з 37 краін, у тым ліку трое грамадзян Беларусі; пацярпела 7,3 тыс.

Паводле афіцыйных дадзеных, па стане на пачатак верасня 2025 года, каля 50 закладнікаў застаецца ў палоне ў Газе, не менш за 27 выкрадзеных няма ў жывых, іх целы ўтрымліваюцца ХАМАСам.

Ізраіль адказаў актыўнай ваеннай аперацыяй, у выніку якой было ліквідавана практычна ўсё кіраўніцтва руху. У той жа час, ёсць шматлікія ахвяры сярод цывільнага насельніцтва. Міністэрства аховы здароўя Газы (структура ХАМАС) заяўляе пра амаль 62 тыс. забітых з пачатку вайны і каля 160 тыс. параненых. Паводле даных Міністэрства аховы здароўя Палестынскай аўтаноміі, якія прызнаюцца як дакладныя ААН, больш за 39% забітых у Газе — мужчыны прызыўнога ўзросту, 19% — жанчыны, 32% — непаўналетнія, больш за 8% — пажылыя людзі.

У лістападзе мінулага года Міжнародны крымінальны суд выдаў ордэры на арышт прэм’ер-міністра Ізраілю Біньяміна Нетаньяху і былога міністра абароны Ёава Галанта. Іх абвінавачваюць ва ўчыненні злачынстваў супраць чалавечнасці і ваенных злачынстваў у перыяд з 7 кастрычніка 2023 года па 20 мая 2024 года.

МУС таксама выдаў ордэр на арышт камандзіра ХАМАСа Махамеда Дэйфа, які, як заяўлялі ізраільскія ўлады, быў забіты ў выніку авіяўдару ў Газе ў ліпені 2024-га.