У магілёўскай калоніі памёр грамадзянін РФ, палітвязень Андрэй Паднябенны (абноўлена)
8 верасня, Позірк. 36-гадовы палітвязень Андрэй Паднябенны памёр 3 верасня ў калоніі № 15 Магілёва, паведаміла на сваёй старонцы ў “Фэйсбуку” яго маці Валянціна Паднябенная.
Паводле інфармацыі праваабарончага цэнтра “Вясна”, Паднябенны — грамадзянін Расіі, але з 6 гадоў пражываў у Беларусі, маючы дазвол на жыхарства. У 2021 годзе ў рамках закрытага працэсу суддзя Анатоль Сотнікаў прыгаварыў мужчыну да 15 гадоў пазбаўлення волі ва ўмовах узмоцненага рэжыму паводле ч. 1 арт. 14 і ч. 3 арт. 218 (замах на наўмыснае знішчэнне або пашкоджанне чужой маёмасці), ч. 1 арт. 3611 (стварэнне экстрэмісцкага фарміравання), ч. 1 і ч. 2 арт. 289 (акт тэрарызму).
Палітвязень быў прызнаны вінаватым у падпале машыны начальніка ўпраўлення Дэпартамента выканання пакаранняў, праколу колаў 39 тралейбусаў, стварэнні і адміністраванні канала і чата ў “Тэлеграме”, што аднесеныя да “экстрэмісцкага фарміравання”, а таксама падпалу крана на будоўлі ў 2019 годзе.
3 студзеня 2023 года Гомельскі абласны суд вынес яшчэ адзін вырак Паднябеннаму, абвінавачанаму дадаткова паводле ч. 1 і 2 арт. 3614 (садзейнічанне экстрэмісцкай дзейнасці), ч. 1 арт. 368 (абраза прэзідэнта), арт. 369 (абраза прадстаўніка ўлады), ч. 1 арт. 130 (распальванне іншай сацыяльнай варожасці і варажнечы). У выніку да 15 гадоў зняволення дадалося яшчэ 1 год і 8 месяцаў пазбаўлення волі ва ўмовах узмоцненага рэжыму. Акрамя таго, палітвязень быў аштрафаваны на 1.000 базавых велічыняў (на той момант 37 тыс. рублёў). Справу ў закрытым рэжыме разглядаў суддзя Руслан Царук.
У 2022–2024 гадах у беларускіх месцах несвабоды памерла не менш за сем чалавек, якіх беларускія праваабарончыя арганізацыі прызнавалі палітычнымі зняволенымі. Гэта Вітольд Ашурак, Мікалай Клімовіч, Алесь Пушкін, Вадзім Храсько, Ігар Леднік, Аляксандр Кулініч, Дзмітрый Шлетгаўэр.
20 траўня стала вядома, што на пачатку 2025 года памёр палітвязень Валянцін Штэрмер. Дакладная дата смерці і яе абставіны невядомыя. Таксама няма інфармацыі, памёр Штэрмер у калоніі ці быў шпіталізаваны.
Акрамя таго, некаторыя людзей, якіх праваабаронцы прызнавалі палітвязнямі, памерлі неўзабаве пасля вызвалення.
Абнаўленне.
Паводле інфармацыі “Радыё Свабода“, прычынай смерці Паднябеннага стала ўдушша.
Ён ужо пахаваны.
