Віншаванне Лукашэнкі з Днем беларускага пісьменства размешчанае толькі на рускамоўнай версіі яго сайта
7 верасня, Позірк. Віншаванне Аляксандра Лукашэнкі з Днём беларускага пісьменства, якое адзначаецца 7 верасня ў Лідзе, размешчанае толькі на рускамоўнай версіі яго сайта.
Апошняя навіна на беларускамоўнай версіі з’явілася 5 верасня, пра што сведчыць зроблены “Позіркам” скрыншот.
Само віншаванне цытуецца на беларускай мове, але загаловак і тлумачальны сказ перад віншаваннем напісаныя па-руску.
У пасланні Лукашэнка называе Дзень беларускага пісьменства “знакавай падзеяй”, якая “зноў і зноў звяртае кожнага з нас да гістарычнай памяці і традыцый продкаў, спрадвечных чалавечых каштоўнасцей, якія ў тым ліку праз кнігу выхоўваюцца з маленства: добразычлівасць і імкненне да ведаў, павага да чалавека і яго працы, сумленнасць і любоў да Бацькаўшчыны”.
Лукашэнка звяртаецца да пісьменнікаў, чые “адказнае і пераканаўчае слова”, “цвёрдая патрыятычная пазіцыя”, як ён спадзяецца, “і надалей будуць спрыяць умацаванню адзінства беларускага народа і развіццю роднай краіны”.
Пад патрыятызмам Лукашэнка, не хаваючы, разумее лаяльнасць і адданасць яму і яго рэжыму.
