Беларусь стала самым папулярным напрамкам у расіян для бранявання гатэляў улетку 2025 года

2 верасня, Позірк. Беларусь узначаліла спіс краін, у якіх расіяне часцей за ўсё бранявалі гатэлі за мяжой улетку 2025 года, паведамляе агенцтва ТАСС са спасылкай на вынікі даследавання сэрвісу для планавання падарожжаў OneTwoTrip.

На Беларусь прыпала 7,6% замежных браняванняў. У дзясятку папулярных паводле гэтага крытэрыю краін таксама ўвайшлі Італія (7,5%), Францыя (7,4%), Кітай (6,6%), Іспанія (6,4%), Турцыя (5,6%), ААЭ (5,1%), Грузія (5%), Казахстан (4,8%) і Тайланд (4,4%).

Пры гэтым, згодна з даследаваннем, “найбольш значна” ўлетку 2025 года ў расіян “вырас попыт на адпачынак” у самаабвешчанай Абхазіі (прызнаная РФ і яшчэ чатырма краінамі — членамі ААН) — у 3,8 разы. У Амане — у 3,7 разы, Люксембургу — у 3,4 разы, Паўночнай Македоніі — у 3 разы, Бахрэйне — у 2,6 разы. Беларусь у матэрыяле ТАСС у гэтым кантэксце не згадваецца.

OneTwoTrip пазіцыянуе сябе як “зручны, выгадны і надзейны анлайн-сэрвіс для арганізацыі падарожжаў” і заяўляе, што з’яўляецца “лідарам рынку ў Расіі і СНД”.

28 жніўня агенцтва ТАСС, са спасылкай на даследаванне анлайн-сэрвісу для куплі авіябілетаў “Авіясэйлс” паведамляла, што Беларусь і Азербайджан падзялілі 7–8 месца паводле колькасці міжнародных пералётаў расіянамі сёлета ўлетку (па 5%), саступіўшы Узбекістану (21%), Турцыі (11%), Арменіі (10%), Грузіі, Кыргызстану і Таджыкістану (па 6%), але апярэдзіўшы Казахстан (4%) і Кітай (3%).

Сёлета ў сакавіку профільны расійскі анлайн-сэрвіс “Туту” паведамляў, што ў 2024 годзе назіраўся “рэзкі рост турыстычнай плыні з РФ у Беларусь”, якая павялічылася на 32% у параўнанні з 2023-м.