Зяленскі заклікаў прэзідэнта МАК Ковентры захаваць “прынцыповую пазіцыю” ў дачыненні да беларускіх спартсменаў
1 верасня, Позірк. Пра размову з прэзідэнтам Міжнароднага алімпійскага камітэта (МАК) Кірсці Ковентры паведаміў у сваім тэлеграм-канале 1 верасня прэзідэнт Украіны Уладзімір Зяленскі.
“Павіншаваў [Ковентры] з абраннем на пасаду, пажадаў поспеху і падзякаваў за падтрымку Украіны і ўкраінскіх спартсменаў”, — адзначыў Зяленскі.
Паводле яго слоў, Расія “працягвае сваю агрэсію і не робіць ніякіх крокаў да міру”. “Цяпер у свеце няма большага разбуральніка спартыўнай інфраструктуры і нават саміх прынцыпаў алімпізму, чым расійская дзяржава. За час поўнамаштабнай вайны ад расійскіх удараў загінулі больш за 600 украінскіх спартсменаў і трэнераў, былі разбураныя сотні нашых спартыўных аб’ектаў”, — падкрэсліў украінскі прэзідэнт.
“Кожная спартыўная падзея, да якой расійская дзяржава дацягваецца, яна заўсёды спрабуе выкруціць на карысць сваёй дзяржаўнай прапагандзе, а гэта прапаганда нянавісці і вайны. Таму трэба трымаць дыстанцыю паміж спартыўным рухам і гэтым расійскім злом”, — заявіў Зяленскі.
Ён паведаміў, што размова з кіраўніком МАК ішла, у прыватнасці, аб “падрыхтоўцы да зімовай Алімпіяды-2026 у Італіі”. “Не толькі мы ва Украіне, але і многія іншыя краіны, якія абараняюць жыццё, аднолькава разлічваюць, што МАК захавае прынцыповую пазіцыю, якая была падчас Алімпіяды ў Парыжы і ў дачыненні да агрэсіўнай Расіі, і ў дачыненні да яе саўдзельніцы Беларусі”, — адзначыў прэзідэнт Украіны.
Ён прапанаваў Ковентры наведаць Украіну.
Зімовыя Алімпійскія гульні пройдуць з 6 па 22 лютага 2026 года ў Мілане і Корціна-д’Ампеца ў Італіі.
28 жніўня стала вядома, што ў іх не змогуць прыняць удзел біятланісты з Беларусі і Расіі.
20 снежня Міжнародны саюз канькабежцаў дазволіў нейтральным атлетам з Беларусі ўдзельнічаць у адборы на Алімпіяду, прыняўшы шэраг абмежаванняў.
28 лютага 2022 года, праз некалькі дзён пасля пачатку вайны ва Ўкраіне, Міжнародны алімпійскі камітэт заклікаў спартовыя федэрацыі не дапушчаць да спаборніцтваў пад сваёй эгідай атлетаў з РФ і Беларусі. Гэтая рэкамендацыя была неадкладна і масава прынята да выканання, у выніку чаго расійскі і беларускі спорт аказаўся амаль у поўнай ізаляцыі.
25 студзеня 2023 года выканкам МАК пацвердзіў санкцыі, уведзеныя ў дачыненні да Беларусі і РФ з-за вайны супраць Украіны, аднак зазначыў, што ніводнаму спартсмену нельга забараняць удзельнічаць у спаборніцтвах “толькі з-за яго пашпарта”.
28 сакавіка МАК выпусціў заяву, у якой рэкамендаваў міжнародным федэрацыям па відах спорту дазволіць беларусам і расіянам удзельнічаць у міжнародных спаборніцтвах у нейтральным статусе. З аналагічнымі ўмовамі МАК дапусціў індывідуальных спартсменаў з Беларусі і Расіі да ўдзелу ў летніх Алімпійскіх гульнях-2024 у нейтральным статусе.
На летняй Алімпіядзе-2024 у Парыжы абмежаваная колькасць беларускіх атлетаў, якія выступалі ў нейтральным статусе, заваявалі чатыры медалі — залаты, два сярэбраныя і бронзавы, заняўшы віртуальнае 50-е месца ў агульным заліку.
41-гадовая грамадзянка Зімбабвэ Ковентры абраная прэзідэнтам Міжнароднага алімпійскага камітэта 20 сакавіка 2025 года. Уступіла на пасаду 23 чэрвеня. У 2013–2025 гадах кіраўніком МАК быў немец Томас Бах.
Напрыканцы ліпеня Ковентры заявіла, что МАК “не будзе спяшацца” з допускам на зімовую Алімпіяду беларускіх і расійскіх спартсменаў.
