У жніўні ў Беларусь уехала амаль 14 тыс. грамадзян Украіны — Дзяржпагранкамітэт
1 верасня, Позірк. У жніўні 2025 года ў Беларусь прыбыў 13.781 грамадзянін Украіны (у ліпені было 13.284), вынікае з інфармацыі Дзяржаўнага памежнага камітэта.
Паводле звестак ведамства, непасрэдна з тэрыторыі Украіны ў апошні месяц лета ў Беларусь прыбыло 11 грамадзян (у ліпені — 6, з пачатку 2025 года — 46), транзітам праз Польшчу — 10.958 (10.660, 63.501), Літву — 2.550 (2.354, 10.660), Латвію — 262 (264, 1.109).
Праведзены “Позіркам” аналіз статыстычных даных Дзяржпагранкамітэта паказаў, што з пачатку поўнамаштабнай расійскай агрэсіі (24 лютага 2022 года), у Беларусь уехала 359.994 грамадзяніна Украіны. З іх непасрэдна праз украінска-беларускую мяжу — 16.063, транзітам праз Польшчу — 268.093, Літву — 68.166, Латвію — 7.622.
Згодна з інфармацыяй пагранічнага ведамства, за 2024 год у Беларусь уехаў 134.561 грамадзянін Украіны. У прыватнасці, як сцвярджалася, з тэрыторыі Украіны гэта зрабіла 68 чалавек, транзітам праз Польшчу — 107.154, Літву — 25.362, Латвію — 1.977. Паводле прыблізных разлікаў “Позірку”, у 2023 годзе ў Беларусь прыбыла больш за 71 тыс. грамадзян Украіны; такім чынам, за год іх колькасць вырасла прыкладна ў 1,9 раза.
“Дзяржпагранкамітэт Беларусі займаецца несумленнай падачай лічбаў і чыстай вады маніпуляцыяй”, — заявіў у інтэрв’ю “Позірку” ў лютым 2024 года Ігар Кізім, які на той момант займаў пасаду амбасадара па асаблівых даручэннях МЗС Украіны па Беларусі. Паводле яго слоў, гаворку трэба весці пра звычайныя паездкі грамадзян Украіны ў Беларусь.
Апошнія даныя ААН дэманструюць значнае скарачэнне колькасці ўкраінскіх уцекачоў. На 31 ліпеня 2025 года па ўсім свеце іх налічвалася 5.675.680 (на 17 красавіка — 6.917.800), у тым ліку ў краінах Еўропы — 5.115.120 (6.357.600).
