1 верасня, Позірк. “Мір на еўразійскай прасторы” павінен быць “не марай або лозунгам, а рэальнасцю”, заявіў Аляксандр Лукашэнка 1 верасня на пасяджэнні Савета кіраўнікоў дзяржаў Шанхайскай арганізацыі супрацоўніцтва ў фармаце “ШАС плюс”.
“Любыя аднабаковыя агрэсіўныя дзеянні, скіраваныя супраць суверэнных дзяржаў, непрымальныя і небяспечныя. Яны дэстабілізуюць абстаноўку і падрываюць асновы міжнароднага права. Асабліва хачу падкрэсліць, што мы падобныя канфлікты ні ў якім разе не павінны правакаваць”, — цытуе Лукашэнку яго прэс-служба.
Спікер выступіў за “ўдасканаленне механізмаў ШАС па супрацьдзеянні пагрозам і выклікам бяспецы, а таксама за ўзмацненне каардынацыі па лініі спецслужбаў і абаронных ведамстваў”: “Беларусь падтрымлівае ініцыятывы ШАС па сумеснай барацьбе з тэрарызмам, кіберпагрозамі, транснацыянальнай злачыннасцю”.
“Менавіта краінам, якіх аб’ядноўвае “шанхайскі дух”, па сілах адыгрываць актыўную ролю ў прадухіленні канфліктаў і прасоўванні мірнага дыялогу”, — заявіў Лукашэнка.
Шматпалярнасць свету “ўжо надышла”, лічыць ён. Паводле сцвярджэння Лукашэнкі, “людзі планеты”, гледзячы на ШАС і БРІКС, “маюць спадзеў”, і ён хоча “зрабіць усё”, каб яго “не знішчыць”.
Мінск стаў паўнапраўным членам ШАС 4 ліпеня 2024 года. Апрача Беларусі і Кітая ў арганізацыю ўваходзяць Індыя, Іран, Казахстан, Кыргызстан, Пакістан, Расія, Таджыкістан і Узбекістан.
Беларусь з 2024 года мае статус партнёра БРІКС.
Лукашэнка наведвае Кітай з 31 жніўня па 3 верасня.
Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны. Наступ распачаўся ў тым ліку і з беларускай тэрыторыі. Рэжым тады арганізаваў дэ-факта тылавое забеспячэнне расійскага войска.
Лукашэнка публічна некалькі разоў прызнаў статус суагрэсара.
