Расійскія вайскоўцы на вучэннях у Беларусі падзеляцца досведам вайны ва Украіне

31 жніўня, Позірк. Вайскоўцы расійскай арміі падзеляцца досведам вайны ва Украіне падчас вучэнняў у Беларусі Калектыўных сіл аператыўнага рэагавання (КСАР) Арганізацыі Дагавора аб калектыўнай бяспецы (АДКБ).

Пра гэта заявіў палкоўнік Узброеных сіл РФ Рыгор Курчанінаў. Вайну ён назваў “спецыяльнай ваеннай аперацыяй” — тэрмінам, які выкарыстоўваецца ўладамі і прапагандай у Расіі і Беларусі для абазначэння ваеннай агрэсіі ва Украіне.

“Вайсковы кантынгент Расійскай Федэрацыі прыбыў у месца дыслакацыі для правядзення вучэнняў. Пачынаючы з заўтрашняга дня, мы прыступаем да трэніровак і выканання вучэбна-баявых задач, якія будуць пастаўленыя камандаваннем”, — цытуе Курчанінава ТАСС.

Палкоўнік адзначыў, што расійскі кантынгент “укараніць” на вучэннях “некаторыя моманты”, якія выкарыстоўваюцца УС РФ ва Украіне.

Пра пачатак вучэнняў КСАР АДКБ паведаміла 31 жніўня Міністэрства абароны Беларусі.

Паводле слоў начальніка Генеральнага штаба Узброеных сіл — першага намесніка міністра абароны Паўла Муравейкі, “усе задачы, якія спланаваныя і намечаныя, будуць адпрацаваныя з высокай якасцю”.

Раней паведамлялася, што вучэнні КСАР АДКБ “Узаемадзеянне-2025”, “Пошук-2025” і “Эшалон-2025” пройдуць на палігонах “Ласвіда” і “Лепельскі” (абодва — Віцебская вобласць) з 31 жніўня па 6 верасня.

Вучэнні “Узаемадзеянне-2025”, як заяўляецца, “нацэленыя на адпрацоўку пытанняў падрыхтоўкі і правядзення сумеснай аперацыі па ўдзеле ў вырашэнні крызіснай сітуацыі на тэрыторыі дзяржавы — члена АДКБ”.

У рамках вучэнняў “Пошук-2025” будуць “адпрацоўвацца пытанні арганізацыі і вядзення выведкі ў інтарэсах КСАР АДКБ”, вучэнні “Эшалон-2025” прадугледжваюць “адпрацоўку пытанняў арганізацыі матэрыяльна-тэхнічнага забеспячэння”.

“Асаблівасцю гэтых вучэнняў у 2025 годзе з’яўляецца тое, што задумы іх правядзення цесна ўвязаныя з задумай сумеснага стратэгічнага вучэння ўзброеных сіл Рэспублікі Беларусь і Расійскай Федэрацыі “Захад-2025”, — заявілі ў АДКБ.

Начальнік аб’яднанага штаба АДКБ Андрэй Сердзюкоў, выступаючы 25 жніўня на брыфінгу, “асабліва падкрэсліў, што вучэнні, якія праводзяцца ў фармаце АДКБ, з’яўляюцца планавымі, не накіраваныя супраць трэціх краін і маюць на мэце ўдасканаленне зладжанасці органаў кіравання і войскаў, а таксама падтрыманне гатоўнасці фарміраванняў сіл і сродкаў да выканання задач па прызначэнні ў інтарэсах забеспячэння калектыўнай бяспекі”.

12–16 верасня пройдуць маштабныя беларуска-расійскія вучэнні “Захад-2025“. Паведамлялася, што падчас вучэнняў будуць адпрацаваныя “планаванне прымянення” ядзернай зброі і комплексу “Арэшнік“, а таксама супрацьпаветраная абарона, абарончыя баявыя дзеянні, падтрымка тактычнай авіяцыі і інш.

Паводле звестак літоўскай вайсковай выведкі, у манеўрах возьмуць удзел да 30 тысяч вайскоўцаў.

Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны.