Удзел Даніі можа стаць важным крокам у бок еўрапейскага выбару беларусаў — Баркоўскі

29 жніўня, Позірк. Нацыянальная культура і ідэнтычнасць дапамагаюць беларусам “супрацьстаяць паглынанню і асіміляцыі”, гэтыя фактары адпавядаюць “патрэбам еўрапейскай бяспекі”, заявіў прадстаўнік Аб’яднанага пераходнага кабінета (АПК) па нацыянальным адраджэнні Павел Баркоўскі 28 жніўня ў Капенгагене на сустрэчы дэмакратычнага лідара Святланы Ціханоўскай з міністрам еўрапейскіх спраў Даніі Мары Б’ерэ.

“Удзел дацкай дыпламатыі можа стаць важным крокам у бок еўрапейскага выбару беларусаў”, — цытуе Баркоўскага прэс-служба АПК.

Як паведамляецца, на сустрэчы прадстаўнік кабінета падкрэсліў “асаблівую ролю” гэтай скандынаўскай дзяржавы ў падтрымцы беларускіх культурных і адукацыйных праграм як на ўзроўні МЗС, так і грамадскіх структур, такіх як Дацкі інстытут культуры.

Баркоўскі заклікаў Данію стаць “адвакатам павелічэння падтрымкі адукацыйных і культурных праектаў у рамках праграмы Ацэнкі патрэбаў грамадзянскай супольнасці Еўракамісіі”.

Ён прапанаваў лабіраваць удзел беларускіх арганізацый у праграме Creative Europe, што “адкрыла б магчымасці для буйных культурных праектаў, асабліва ў кінавытворчасці”.

Адзначаецца, што на сустрэчы Ціханоўская абмеркавала з Б’ерэ і амбасадарам Даніі ў Літве Грэтай Сіласен перспектывы супрацоўніцтва ў “прасоўванні інтарэсаў беларускага народа на еўрапейскіх пляцоўках, дапамогу палітвязням, моладзевым арганізацыям”.

Раней дэмлідар напісала ў сацсетцы Х (“Твітар”), што бакі на сустрэчы разгледзелі таксама пытанне падтрымкі Даніяй беларусаў падчас яе старшынства ў Еўрасаюзе (з 1 ліпеня па 31 снежня 2025 года).

“Данія — прыклад для нас. Невялікая, але моцная і прынцыповая краіна, сусветны лідар у галіне дэмакратыі”, — падкрэсліла Ціханоўская.

Палітык наведвае Данію 28–29 жніўня разам з мужам, экс-палітвязнем Сяргеем Ціханоўскім.

Адзначалася, што 29 жніўня ў Капенгагене яна возьме ўдзел у нефармальнай сустрэчы міністраў замежных спраў краін Еўрасаюза.

Анансаваныя сустрэчы з дацкімі палітыкамі міністэрскага і парламенцкага ўзроўняў, а таксама іншыя мерапрыемствы.

Гэта чацвёрты візіт Ціханоўскай у Данію. Яна наведвала гэтую краіну 8–10 кастрычніка 2023 года. У кастрычніку 2020-га дэмлідар сустрэлася з тагачасным кіраўніком МЗС Епэ Кофадам, а ў траўні 2023-га ўдзельнічала ў Капенгагенскім саміце дэмакратыі.