Котаў пакінуў Турцыю па моры з польскім праязным дакументам — СМІ (абноўлена)

Дададзены актуальны каментар кіраўніка Беларускага фонду спартыўнай салідарнасці Аляксандра Апейкіна

29 жніўня, Позірк. Міжнародны каардынатар Беларускага фонду спартыўнай салідарнасці (БФСС) Анатоль Котаў, які 27 жніўня быў абвешчаны БФСС зніклым без вестак у Турцыі, пакінуў краіну 21 жніўня ў 18:35 праз порт Трабзон на Чорным моры, пры гэтым ён выкарыстаў польскі праязны дакумент, вынікае з інфармацыі турэцкага навінавага агенцтва IHA.

Са спасылкай на свае крыніцы яно адзначае, што ў Стамбул Котаў прыбыў у той жа дзень а 13:49 з Варшавы. Куды ён адправіўся з Трабзона, не ўдакладняецца.

27 жніўня БФСС заклікаў міжнародную спартыўную супольнасць і праваабарончыя арганізацыі “тэрмінова звярнуць увагу на знікненне“ функцыянера, якога называе “вядомым спартовым чыноўнікам“ і “даўнім абаронцам правоў беларускіх спартоўцаў“.

БФСС адзначаў, што Котаў 21 жніўня адправіўся ў Стамбул па “прафесійных справах“.

“Неўзабаве пасля яго прыбыцця кантакт з ім быў страчаны. У апошні раз ён выходзіў на сувязь у той жа дзень. З тых часоў яго месцазнаходжанне застаецца невядомым“, — гаварылася ў рэлізе.

Пра страту сувязі з прадстаўніком БФСС Котавым паведаміў у “Фэйсбуку” 25 жніўня кіраўнік арганізацыі Аляксандр Апейкін.

Котаў — экс-супрацоўнік адміністрацыі Аляксандра Лукашэнкі і Кіраўніцтва справамі прэзідэнта, былы генеральны сакратар Нацыянальнага алімпійскага камітэта, дыпламат з вопытам работы ў Міністэрстве замежных спраў.

У 2020 годзе пакінуў дзяржслужбу, падтрымаў масавыя пратэсты і далучыўся да БФСС. Неўзабаве пасля гэтага эміграваў у Польшчу.

Беларускі фонд спартыўнай салідарнасці быў заснаваны спартыўнымі функцыянерамі і атлетамі ў адказ на падзеі пасля прэзідэнцкіх выбараў 2020 года. Займаецца падтрымкай спартсменаў, якія церпяць пераслед, і абаронай іх правоў. Прызнаны “экстрэмісцкім фарміраваннем”.

Абнаўленне.

27 жніўня Аляксандр Апейкін паведаміў, што “калегі і блізкія Анатоля Котава дапускаюць яго прымусовую неафіцыйную экстрадыцыю з тэрыторыі Турцыі”. Іншыя версіі “пакуль не разглядаюцца, бо пакінуць Турцыю ў бок Расіі ці Беларусі можна без цяжкасцей з аэрапорта Стамбула“, “для гэтага не патрэбныя складаныя марскія маршруты“.