Забарона на ўвоз асобных тавараў праз беларуска-літоўскую мяжу падоўжаная яшчэ на паўгода

28 жніўня, Позірк. Да 1 красавіка 2026 года падоўжаная забарона на ўвоз асобных тавараў праз беларуска-літоўскі ўчастак дзяржмяжы, вынікае з падпісанай прэм’ер-міністрам Аляксандрам Турчыным пастановы ўрада.

Дакумент 28 жніўня апублікаваны на Нацыянальным прававым інтэрнэт-партале.

Папярэдні раз забарона падаўжалася да 1 кастрычніка 2025 года, Новы паўгадавы тэрмін яе дзеяння стане чацвёртым.

Забарона на імпарт асобных тавараў з Літвы ўведзена пастановай Савета міністраў № 182 ад 14 сакавіка 2024 года. Яна тычыцца “малака і вяршкоў згушчаных, садавіны і арэхаў, кавы, сокаў фруктовых, вод, воцату, калгот, панчох, гольфаў, шкарпэтак і іншых панчошна-шкарпэткавых вырабаў, асобных будаўнічых вырабаў, халадзільнікаў і маразільнікаў” літоўскай вытворчасці.

Акрамя таго, праз пункты пропуску на беларуска-літоўскай мяжы забаронена перавозіць “вады, піва, віны, сусла вінаграднае, вермуты, іншыя напоі зброджаныя, спірт этылавы, воцат, шыны і пакрышкі пнеўматычныя гумовыя, адзенне і іншыя вырабы, якія былі ва ўжыванні, а таксама былыя ва ўжыванні часткі і прыналежнасці транспартных сродкаў”. Краіна паходжання значэння не мае.