Дзяржпагранкамітэт выявіў больш за 15 спробаў “нелегальнага выкарыстання льготнага права на ўезд” у пункт пропуску Брэст

26 жніўня, Позірк. У пункце пропуску Брэст (з польскага боку Цярэспаль) “працягваецца праца па спыненні злоўжывання льготамі” пры перасячэнні мяжы, паведаміла 26 жніўня прэс-служба Дзяржаўнага памежнага камітэта (ДПК).

“За апошнія дні міжведамаснай аператыўнай групай выяўлена больш за 15 спробаў нелегальнага выкарыстання льготнага права на ўезд у пункт пропуску”, — гаворыцца ў паведамленні.

Сярод парушальнікаў — два грамадзяніны Польшчы з інваліднасцю, якія прапаноўвалі кіроўцам аўтамабіляў “сумесна перасекчы мяжу, абыходзячы агульную чаргу за кошт ільготнага статусу”. “За гэтую паслугу мужчыны спрабавалі атрымаць узнагароду”, — адзначылі ў ДПК.

“З усімі парушальнікамі супрацоўнікі падатковай інспекцыі правялі прафілактычныя гутаркі. Большасці грамадзян вынесеныя афіцыйныя папярэджанні і прызначаныя штрафы”, — паведамляецца ў рэлізе.

Заяўляецца, што праца па спыненні “падобнай супрацьпраўнай дзейнасці” праводзіцца “ў кругласутачным рэжыме”.

На 14 гадзін 26 жніўня выезду з Беларусі ў Польшчу ў пункце пропуску Брэст чакала 4.340 легкавых аўтамабіля і 12 аўтобусаў.

На 10 гадзін 26 жніўня 4.868 легкавых аўтамабіляў і 30 аўтобусаў чакала выезду з Беларусі ў Еўрасаюз, сведчыць праведзены “Позіркам” аналіз аператыўных звестак Дзяржпагранкамітэта з памежных пераходаў.

Суткамі раней на 10 гадзін было 5.040 легкавых аўтамабіляў і 48 аўтобусаў, год таму — 560 аўтамабіляў (у 8,7 раза менш) і 70 аўтобусаў.

Раней Дзяржпагранкамітэт заяўляў, што “закладнікамі сітуацыі, якая стала вынікам дзеянняў польскіх службаў, апынуліся звычайныя турысты, сярод якіх шмат грамадзян з краін Еўрасаюза”.

Польскія памежнікі тлумачылі павольнае праходжанне мяжы неабходнасцю больш дбайнай праверкі.

Брэст — адзіны даступны для падарожнікаў аўтамабільны пункт пропуску на мяжы Беларусі і Польшчы.

Пасля вынясення палітычна матываванага прысуду журналісту, актывісту неафіцыйнага Саюза палякаў Беларусі Анджэю Пачобуту (8 гадоў пазбаўлення волі) 10 лютага 2023 года Польшча на нявызначаны тэрмін закрыла другі аўтамабільны пункт — Баброўнікі (з беларускага боку Бераставіца).

8 жніўня 2023 года Літва закрыла пункты пропуску Шумскас (Лоша) і Твярачус (Відзы), 1 сакавіка 2024-га — Лаварышкес (Катлоўка) і Райгардас (Прывалка). На мяжы з Беларуссю працягваюць працаваць два памежныя пераходы — Мядзінінкай (Каменны Лог) і Шальчынінкай (Беняконі).

19 верасня 2023 года праз узрослы паток нелегальных мігрантаў з боку Беларусі Латвія на нявызначаны тэрмін закрыла і забарыкадавала пункт пропуску Сілене (Урбаны).