Былы кіраўнік нямецкай дыпмісіі ў Мінску паведаміў аб зняцці мараторыю на прыём беларусаў паводле гуманітарных меркаванняў

23 жніўня, Позірк. Аб зняцці мараторыю на прыём беларускіх грамадзян паводле гуманітарных меркаванняў паведаміў кіраўнік аддзела знешнепалітычнага ведамства Германіі па пытаннях Расіі, Беларусі і рэгіянальных арганізацый СНД, АДКБ і ЕАЭС, былы часовы павераны ў справах ФРГ у Беларусі Міхаэль Новак.

Інфармацыя прагучала на дні адчыненых дзвярэй, які праводзіць МЗС 23 і 24 жніўня, паведаміў аб’яднаны тэлеграм-канал нямецкіх праваабарончых арганізацый SaveHumVisa22, створаны 31 ліпеня 2025 года ў падтрымку размарожвання працэсу выдачы гуманітарных віз грамадзянам Расіі і Беларусі.

Паводле слоў Новака, якога цытуе канал, ведамствы абмяркоўваюць умовы аднаўлення выдачы такіх віз.

“Гэта правільнае і своечасовае рашэнне. Мы ўдзячныя нямецкаму МЗС, дэпутатам Бундэстага і Еўрапейскага парламента, з якімі былі на сувязі апошнія тыдні“, — заявіў “Позірку“ галоўны дарадца беларускага дэмакратычнага лідара Святланы Ціханоўскай Франак Вячорка.

“Мы тлумачылі, чаму важныя для беларусаў гуманітарныя візы — як з практычнага, так і з сімвалічнага пункту гледжання, — сказаў Вячорка. — Мы радыя, што гэты мараторый зняты. Спадзяюся, што гэтае рашэнне дапаможа захаваць людзям свабоду, бо цяпер рэпрэсіі не спыняюцца, а толькі ўзмацняюцца“.

Паводле слоў дарадцы, у Германіі выдатна разумеюць, што адбываецца ў Беларусі, таму падтрымка рэпрэсаваных і грамадзянскай супольнасці працягваецца.

Выдача гуманітарных віз, у тым ліку грамадзянам Беларусі, была прыпыненая ў рамках кааліцыйнага пагаднення кіруючых партый: хрысціянска-дэмакратычнай (дзейнічае ва ўсіх землях, апроч Баварыі), Хрысціянска-сацыяльнага саюза (дзейнічае толькі ў Баварыі) і Сацыял-дэмакратычнай партыі. “Урадавая кааліцыя ў сваім кааліцыйным пагадненні дамовілася завяршыць, наколькі гэта магчыма, федэральныя праграмы добраахвотнага прыёму [замежнікаў] і не пачынаць новыя. У цяперашні час вывучаецца пытанне, як гэта можа быць рэалізавана ў дачыненні да розных праграм. Да прыняцця рашэння ўсе працэдуры прыпыненыя“, — гаварылася ў адказе прэс-службы Міністэрства ўнутраных спраў Германіі на запыт “Позірку” сёлета ў ліпені.

Раней атрымаць нямецкую гуманітарную візу можна было ў рамках праграм прыёму замежнікаў на федэральным і зямельным узроўнях. У адпаведным раздзеле на сайце МУС Беларусь згадваецца ў падпункце “Індывідуальны прыём паводле асаблівых гуманітарных альбо палітычных падстаў“.

Нямецка-швейцарская праваабарончая арганізацыя Libereco запатрабавала ад урада ФРГ аднавіць выдачу гуманітарных віз беларусам, якія пераследуюцца з палітычных матываў.