20 жніўня, Позірк. У ліпені валавы ўнутраны прадукт скараціўся прыкладна на 2,7% (тут і далей у гадавым вымярэнні), на яго зніжэнне ў асноўным паўплывала “адставанне ва ўборцы збожжа”, гаворыцца ў экспрэс-аналізе даследчага цэнтра BEROC.
Без уліку ўкладу сельскай гаспадаркі прырост ВУП у ліпені экспертамі ацэньваецца на ўзроўні 0,1%.
“Адсутнічаў рост выпуску ў ключавых экспартнаарыентаваных сектарах эканомікі — прамысловасці, аптовым гандлі, грузавых перавозках, ІТ”, — адзначаецца ў аналізе.
На думку BEROC, гэта ўказвае на “стрыманы знешні попыт і абмежаваны вытворчы патэнцыял у асяроддзі залішняй загрузкі магутнасцяў”.
“У такіх умовах павелічэнне ўнутранага попыту шмат у чым задавальнялася за кошт імпарту. У жніўні рост ВУП рэзка паскорыцца ў выніку ўзрастання тэмпаў ўборачнай кампаніі і можа аказацца паблізу 5%. Назапашаны за восем месяцаў прырост ВУП паднімецца да 1,5–1,8%”, — прагназуюць эканамісты.
Да 1 жніўня ў сельскагаспадарчых арганізацыях сабралі збожжа з 22,3% плошчаў, у той час як годам раней — з 59,3%, звяртаюць увагу эксперты. З улікам рапсу на ўказаную дату ўраджай быў сабраны з амаль удвая меншай плошчы ў параўнанні з аналагічным перыядам мінулага года.
“У той жа час ураджайнасць збожжа ў бягучым годзе прыкметна перавышае леташнюю, што дазваляе разлічваць на дастаткова высокі выніковы ўраджай, супастаўны з паказчыкамі 2020 і 2022 гадоў. У выніку сельская гаспадарка пакажа істотны рост дабаўленай вартасці ў жніўні і ўнясе значны ўклад у прырост ВУП”, — падкрэслівае BEROC.
Выпуск прамысловасці (з ліквідацыяй сезоннасці) паказаў “калянулявую дынаміку” ў ліпені ў адносінах да папярэдняга месяца, гаворыцца ў аглядзе. Складскія запасы ў мінулым месяцы працягнулі расці, але меншымі тэмпамі на фоне “дасягнутых рэкордных узроўняў за больш чым 20-гадовы перыяд”.
Адначасова ў апошнія месяцы прыкметна знізіліся і адносіны экспарту тавараў да выпуску прамысловасці, што, на думку BEROC, пацвярджае “цяжкасці са збытам на расійскім рынку ў асяроддзі паслаблення эканамічнай актыўнасці ў Расіі”. У сувязі з гэтым прагназуецца, што “назапашаны з пачатку года прырост выпуску ў прамысловасці застанецца адмоўным у бліжэйшыя месяцы”.
Дабаўленая вартасць сектара інфармацыі і сувязі вырасла прыкладна на 0,3% у ліпені, што адпавядае калянулявому ўкладу ў гадавы прырост ВУП, адзначаюць эксперты.
“Нельга выключаць, што працэс аднаўлення ў ІТ-сферы пачынае тармазіць у сілу абмежаванай ёмістасці ўнутранага рынку, высокай канкурэнцыі з боку расійскіх кампаній на рынку ЕАЭС і складанасцяў з працай на рынках заходніх краін у санкцыйным асяроддзі”, — мяркуюць у BEROC.
Валавы ўнутраны прадукт Беларусі павялічыўся за першыя сем месяцаў 2025 года на 1,3%. Аб’ём ВУП у бягучых цэнах склаў 155 млрд 212 млн 811 тыс. рублёў.
У студзені 2025 года гэты паказчык быў на ўзроўні 3,7% (20,5 млрд), у студзені — лютым — 3,1% (38,7 млрд), у студзені — сакавіку — 3,1% (59,4 млрд), у студзені — красавіку — 2,8% (81,4 млрд), у студзені — траўні — 2,5%, у студзені — чэрвені — 2,1% (129 млрд).
Эканоміка Беларусі будзе павольна “астываць” у сярэднетэрміновай перспектыве пры адсутнасці моцных знешніх шокаў, гаворыцца ў прагнозе даследчага цэнтра BEROC па выніках першай паловы 2025 года. Прэзентацыя аналізу прайшла 12 жніўня.
На думку экспертаў, вяртанне да раўнаважнага стану “чакаецца працяглым”, бо ўзровень перагрэву ў другім квартале 2025 года “заставаўся паблізу рэкордных значэнняў з 2014 года, а агулам няжкая эканамічная палітыка прадоўжыць падтрымліваць высокі ўзровень унутранага попыту”.
“Рост ВУП прагназуецца паблізу 2% у 2025 годзе з наступным запаволеннем да 0–1,5% у 2026-м”, — прагназуе BEROC.
Згодна з зацверджанымі Лукашэнкам найважнейшымі эканамічнымі прагнознымі (дэ-факта — планавымі) параметрамі на 2025 год, рост ВУП павінен скласці 4,1%.
Зніжэнне тэмпаў росту ВУП Беларусі да 1,6% прагназуе Еўразійскі фонд стабілізацыі і развіцця ў сваім рэгіянальным эканамічным аглядзе, апублікаваным 16 красавіка.
24 чэрвеня аналітыкі Еўразійскага банка развіцця ў макраэканамічным прагнозе на 2025–2027 гады адзначылі, што чакаюць рост ВУП Беларусі па выніках 2025 года на ўзроўні 3%.
Міжнародны валютны фонд у красавіцкім аглядзе прагназаваў, што ВУП Беларусі павялічыцца ў 2025-м на 2,8%.
12 чэрвеня Сусветны банк выдаў прагноз, паводле якога беларуская эканоміка ў 2025 годзе вырасце на 2,2%.
Еўрапейскі банк рэканструкцыі і развіцця чакае росту ВУП на 2,5%.
У студзені 2024 года ВУП Беларусі складаў 2,8%, студзені — лютым — 4 працэнты, студзені — сакавіку — 4,1 працэнта, студзені — красавіку — 5,1%, студзені — траўні — 5,2%, студзені — чэрвені — 5%, студзені — ліпені — 5,5%, студзені — жніўні — 4,9%, студзені — верасні — 4,5%, студзені — кастрычніку — 4,2%, студзені — лістападзе — 3,9%, студзені — снежні — 4%.
