Арышт ухіліста ад войска бабруйскі пракурор матываваў вайной ва Украіне і “спробамі Захаду расхістаць” Беларусь

19 жніўня, Позірк. Да трох месяцаў арышту прыгавораны “жыхар Бабруйшчыны, прызыўнік М., якому было прад’яўлена абвінавачанне ва ўхіленні ад мерапрыемстваў па прызыве на воінскую службу”, паведамляе сайт раённай дзяржгазеты “Трыбуна працы”.

Рашэнне вынесенае судом Бабруйска і раёна 18 жніўня, паказальнае паседжанне прайшло ў зале мясцовага ваеннага камісарыята.

Удакладняецца, што фігурант, “атрымаўшы позву пад роспіс і ведаючы аб неабходнасці з’явіцца ва ўказаны тэрмін для праходжання медагляду, з’ехаў з краіны”, знаходзіўся ў вышуку і “толькі праз два гады з’явіўся ў родныя мясціны”.

Выданне прыводзіць каментар памочніка пракурора Бабруйскага раёна Віталя Сідзюка, які заявіў, што наглядныя органы “прымушае быць напагатове ўзмоцненая мілітарызацыя прыгранічных дзяржаў і баявыя дзеянні па суседстве на фоне бесперапынных спроб Захаду расхістаць унутрыпалітычную сітуацыю ў Беларусі”.

Грамадскай небяспекай ухілення ад войска ён назваў “замах на пастаяннае функцыянаванне сістэмы мерапрыемстваў, якія забяспечваюць заклік, што закранае інтарэсы бяспекі і абараназдольнасці краіны, перашкаджае абароне суверэнітэту, незалежнасці, канстытуцыйнага ладу і тэрытарыяльнай цэласнасці Беларусі”.

За ўхіленне ад службы прадугледжана адказнасць паводле арт. 435 Крымінальнага кодэкса (ухіленне ад мерапрыемстваў па прызыве на воінскую службу). Яе санкцыя прадугледжвае грамадскія працы, ці штраф, ці арышт, ці абмежаванне волі на тэрмін да двух гадоў, ці пазбаўленне волі на тэрмін да пяці гадоў.

Па дадзеных Вярхоўнага суда, колькасць грамадзян, якіх прыцягваюць па гэтым артыкуле, памяншаецца. У 2016 годзе паводле арт. 435 КК было асуджана 676 асоб, у 2023-м — 266.

Як паведамлялася, указ “Аб звальненні ў запас і прызыве на тэрміновую ваенную службу, службу ў рэзерве” Аляксандр Лукашэнка падпісаў 12 жніўня. Дакумент прадугледжвае прызваць у верасні — лістападзе 2025 года на тэрміновую ваенную службу, службу ў рэзерве грамадзян Беларусі мужчынскага полу, якім да дня прызыву споўнілася 18 гадоў і якія не маюць права на адтэрміноўку, а таксама грамадзян прызыўнога ўзросту, якія страцілі права на адтэрміноўку.