Яшчэ аднаму грамадзяніну Беларусі ў Польшчы прад’яўлена абвінавачанне ў падрыхтоўцы дыверсіі

19 жніўня, Позірк. Грамадзяніну Беларусі прад’яўлена абвінавачанне ў дзейнасці ў інтарэсах замежнай разведкі і падрыхтоўцы да ажыццяўлення дыверсійнай дзейнасці, якая заключаецца ў падпале складскога памяшкання ў Люблінскім ваяводстве (арт. 130 § 8 Крымінальнага кодэкса), паведамляе Пракуратура Польшчы.

Адзначаецца, што 27-гадовы грамадзянін Беларусі Віталь С. затрыманы 13 жніўня за тое, што ў ліпені 2025 года збіраў даныя аб складскім аб’екце, размешчаным у Люблінскім ваяводстве, рабіў відэа- і фотаздымку, а потым перадаў гэтыя матэрыялы прадстаўнікам знешняй разведкі.

Мужчына прызнаў прад’яўленыя яму абвінавачанні. У дачыненні да яго ўжыты арышт тэрмінам на 3 месяцы ў выглядзе меры стрымання.

Падрыхтоўка да дыверсіі ці падрыўной дзейнасці на карысць замежнай разведкі ў Польшчы караецца пазбаўленнем волі на тэрмін да 8 год.

Як паведамлялася, пракуратура краіны 6 жніўня накіравала ў Акруговы суд Вроцлава крымінальную справу ў дачыненні да шасці членаў арганізаванай злачыннай групы, якіх абвінавачваюць у “арганізацыі і ажыццяўленні актаў сабатажу, незаконным абароце зброі і наркотыкаў, а таксама ў іншых злачынствах”.

Абвінаваўчае заключэнне датычыцца: падпалу і пажару ў рэстаране ў Гдыні (2023 год) і падпалу склада паддонаў у Марках (усходні прыгарад Варшавы) па замове замежнай разведкі (2024 год). Па гэтых эпізодах праходзяць Сцяпан К. і Андрэй Б.

Яшчэ адна справа звязана са спробай падпалу склада ў Гданьску таксама на замову замежнай разведкі (2024 год, усе беларусы).

Усе падпалы здзяйсняліся “кіданнем бутэлек з запальнай вадкасцю ў будынкі ці іншыя аб’екты”.

Сцяпану К. прад’яўлены абвінавачанні па васьмі злачынствах (у тым ліку ўдзел у АЗГ, падпалы, незаконны абарот зброі, захоўванне выбуховых рэчываў і замах на прычыненне цяжкай шкоды здароўю, актах сабатажу, учыненых па заказу замежнай разведкі).

Андрэю Б. — у пяці (у т.л. удзеле ў АЗГ, замаху на падпал, сабатажы, незаконным абароце наркотыкаў).

Яраславу С. — у трох (у тым ліку ва ўдзеле ў АЗГ, дыверсіі і незаконным абароце наркотыкаў).

Па дадзеных пракуратуры, Сцяпан К. не прызнаў сябе вінаватым у прад’яўленых абвінавачваннях і даў кароткія тлумачэнні, Андрэй Б. — часткова прызнаў прад’яўленыя абвінавачванні і даў разгорнутыя тлумачэнні, Яраслаў С. — часткова прызнаў прад’яўленае абвінавачванне і даў тлумачэнні.

13 лістапада мінулага года стала вядома, што супрацоўнікі Агенцтва ўнутранай бяспекі Польшчы (АУБ) затрымалі ў Варшаве грамадзяніна Беларусі, якога падазраюць у спробе падпалу аб’екта, размешчанага ў Гданьску.

Адзначалася, што гэта “чарговы арышт у рамках расследавання дзейнасці арганізаванай злачыннай групы, якая на замову замежных спецслужбаў здзяйсняла дыверсіі, у прыватнасці, падпалы”.

28 траўня 2024 года стала вядома, што АУБ затрымала ў Варшаве траіх падазраваных у здзяйсненні і падрыхтоўцы падпалаў і дыверсій на тэрыторыі краіны.

Заяўлялася, што ў ліку затрыманых паляк і два беларусы. Адзін з беларускіх грамадзян можа быць экс-супрацоўнікам МУС, іншы — раней судзімым былым байцом ММА.

Па дадзеных аб’яднання былых сілавікоў ByPol, усе трое затрыманых па “справе аб падпалах” раней удзельнічалі ў баявых дзеяннях на тэрыторыі Украіны на баку ВСУ, служылі ў складзе батальёна “Тэрор”. Пры гэтым яны “выкарыстоўваліся расійскімі спецслужбамі “ўцёмную”, выконваючы за грошы ў Польшчы крымінальныя заказы”.

Арганізацыя называла імёны дваіх – Андрэй Белы і Сцяпан Касцючэнка.

21 мая мінулага года прэм’ер-міністр Польшчы Дональд Туск заявіў, што сярод падазраваных у арганізаваных Расіяй спробах дыверсій ёсць грамадзяне Беларусі. Размова ішла, у прыватнасці, аб спыненай спробе падпалу завода па вытворчасці фарбаў ва Вроцлаве.