За год аб’ём складскіх запасаў прампрадукцыі вырас на траціну, за пяць гадоў — больш чым удвая
19 жніўня, Позірк. Па выніках студзеня — ліпеня 2025 года аб’ём складскіх запасаў прамысловай прадукцыі ў грашовым выражэнні склаў 11 млрд 215 млн 770 тыс. рублёў — на 33,9% больш, чым за аналагічны перыяд 2024-га (8 млрд 378 млн 221 тыс.), і ў 2,1 раза, чым за сем месяцаў 2020-га (5,303 млрд), вынікае з праведзенага “Позіркам” аналізу даных Нацыянальнага статыстычнага камітэта.
Найгоршая дынаміка ў гадавым вымярэнні зафіксаваная ў Магілёўскай вобласці — рост на 53,2% (з 631 млн 994 тыс.да 968 млн 426 тыс.).
Далей ідуць: Гродзенская вобласць — на 52,5% (з 991 млн 399 тыс. да 1 млрд 511 млн 788 тыс.), Гомельская — на 36,7% (з 788 млн 471 тыс. да 1 млрд 77 млн 969 тыс.), Мінская — на 33,4% (з 2 млрд 87 млн 512 тыс. да 2 млрд 784 млн 939 тыс.), Мінск — на 31,4% (з 1 млрд 810 млн 981 тыс. да 2 млрд 379 млн 726 тыс.), Брэсцкая вобласць — на 23,4% (з 1 млрд 155 млн 665 тыс. да 1 млрд 425 млн 910 тыс.), Віцебская — на 17% (з 912 млн 199 тыс. да 1 млрд 67 млн 12 тыс.).
