Хрэнін: Мы рыхтуемся да вайны

17 жніўня, Позірк. Аб падрыхтоўцы Узброеных сіл “да вайны” ў кантэксце адбіцця нападу заявіў міністр абароны Віктар Хрэнін па выніках даклада Аляксандру Лукашэнку 13 жніўня.

Відэа яго размовы з дзяржСМІ было паказана 17 жніўня ў праграме “Арсенал” на тэлеканале “Беларусь 1”.

Адказваючы на пытанне, ці гатова Беларусь да адбіцця раптоўнага нападу, Хрэнін сказаў: “Я разумею, што гэтае пытанне моцна непакоіць, але гэта асноўная наша, арміі наогул — быць гатовымі да адбіцця агрэсіі праціўніка”.

Паводле яго, для гэтага УС “пастаянна займаюцца ўдасканаленнем падрыхтоўкі штабоў, войскаў”, удакладняюць сваю структуру, “глядзяць, як развіваюцца канфлікты, уносяць змяненні ў свае дакументы, формы і спосабы дзеяння войскаў”.

“Мы праводзім і вучэнні, і трэніроўкі, адмабілізоўваем ваеннаабавязаных, — заявіў міністр. — Вы бачыце той комплекс мерапрыемстваў, чым цяпер займаюцца Узброеныя сілы. Вось гэта адным словам называецца “мы рыхтуемся да вайны”.

Пасля даклада, які насіў закрыты характар, Хрэнін паведаміў, што на сумесных з РФ вучэннях “Захад-2025” 12–16 верасня адпрацуюць прымяненне ядзернай зброі і комплексу “Арэшнік”.

Як паведамлялася, у падрыхтоўцы да вайны абвінаваціў краіны Захаду першы намеснік міністра абароны — начальнік Генеральнага штаба ВС Павел Муравейка ў інтэрв’ю рэсурсу адміністрацыі Лукашэнкі “СБ. Беларусь сегодня” 10 ліпеня.

Пра тое, што Беларусь “літаральна знаходзіцца ў прыфрантавой паласе” і што “мы ўжо даўно ваюем”, заявіў Хрэнін у лютым.

Рыхтавацца да правакацый Захаду з “тэрарыстычнымі практыкамі” на тэрыторыі Беларусі заклікаў у чэрвені памочнік міністра абароны — начальнік галоўнага ўпраўлення ідэалагічнай працы Мінабароны Леанід Касінскі.

Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны.