15 жніўня, Позірк. Указ аб “прызначэнні пенсій асобным катэгорыям грамадзян за працу ва Украіне“ падпісаў Аляксандр Лукашэнка, паведаміла 14 жніўня яго прэс-служба.
Як адзначае Міністэрства працы і сацыяльнай абароны, палажэнні дакумента прадугледжваюць уключэнне ў стаж (страхавы і агульны) пры прызначэнні пенсіі ў Беларусі асобам, якія “пераехалі з Украіны на пастаяннае жыхарства, перыядаў іх працы ва Украіне да 1 ліпеня 1998 года“.
“Грамадзянам, якія маюць не ўлічаныя ў стаж перыяды працы ў Украіне да 1 ліпеня 1998 года, неабходна звярнуцца ў орган па працы, занятасці і сацыяльнай абароне (па месцы прызначэння пенсіі) з заявай аб пераразліку пенсіі“, — раіць ведамства.
Пераразлік пенсіі ў сувязі з дадатковым уключэннем у стаж працы ў Украіне будзе ажыццёўлены з 1-га чысла месяца, наступнага за месяцам падачы заявы.
“Раней, у сувязі з дэнансацыяй Украінай міжнародных дагавораў па пытаннях пенсійнага забеспячэння (у тым ліку двухбаковага дагавора з Рэспублікай Беларусь), прававых падстаў для ўключэння ў стаж працы грамадзян ва Украіне пасля 1 студзеня 1992 не мелася“, — гаворыцца ў паведамленні Мінпрацы.
Вярхоўная Рада Украіны 29 траўня 2023 года з ініцыятывы ўрада прыняла закон аб дэнансацыі міжурадавага пагаднення з Беларуссю “Аб гарантыях правоў грамадзян у галіне пенсійнага забеспячэння“.
З прыняццем закона дагаворна-прававая база ў сферы сацыяльнага забеспячэння будзе прыведзеная ў адпаведнасць з яе “нацыянальнымі інтарэсамі і сучасных рэалій знешняй палітыкі“.
Як паведамляе прэс-служба парламента краіны, дакумент прымаўся зыходзячы з падтрымкі Беларуссю ўзброенай агрэсіі Расиі супраць Украіны, што “з’яўляецца парушэннем прынцыпаў і нормаў міжнароднага права, мэтаў і прынцыпаў, якімі кіравалася Украіна, складаючы ўказаны міжнародны дагавор“.
У Вярхоўнай Радзе падкрэслілі, што прыняцце закона “не паўплывае на рэалізацыю правоў грамадзян, атрыманых у адпаведнасці з палажэннямі пагаднення“.
Аўтарызавацца
Забыліся пароль?
Выхад з профілю
