Латушка пра чыноўнікаў, якія падтрымліваюць вайну: Адчыняюцца “рускія кансервы“

14 жніўня, Позірк. З крытыкай старшыні Лідскага райвыканкама (Гродзенская вобласць) Аляксандра Версоцкага, які падтрымаў вайну Расіі супраць Украіны, выступіў кіраўнік Народнага антыкрызіснага ўпраўлення (НАУ) Павел Латушка на сваім ютуб-канале.

Даючы справаздачу аб правядзенні ў горадзе “дыялогавай пляцоўкі“ з удзелам падлеткаў з РФ, той 12 жніўня напісаў у сваім тэлеграм-канале: “Маё сэрца заўсёды належала Расіі. Як старшыня райвыканкама, я цалкам падтрымліваю тую місію, якую выконвае Расійская Федэрацыя. Мы разам дапамагалі — адпраўлялі гуманітарныя канвоі, збіралі рэчы для хлопцаў на лініі баявога судакранання“.

“Дык што, “кансервы” адчыняюцца? — сказаў Латушка. — Пытанне зноў да КДБ: вось вы перманентна змагаецеся супраць беларускай апазіцыі, якая прадстаўляе большасць беларускага грамадства, менавіта тая большасць, якая хоча, каб Беларусь была незалежнай і вольнай дзяржавай. А што вы будзеце рабіць з гэтымі “рускімі кансервамі”?”

“Чыноўнік беларускі кажа, што ягонае сэрца належыць Расіі? Ён не пераблытаў краіны, ён не забыўся, які пашпарт у яго ў кішэні? Ён не забыўся, што Ліда знаходзіцца на тэрыторыі Рэспублікі Беларусь?” — дадаў кіраўнік НАУ.

48-гадовы Вярсоцкі ўзначальвае Лідскі райвыканкам з верасня 2024 года. Паводле адукацыі настаўнік геаграфіі і біялогіі, менеджэр ў сферы адукацыі і дзяржкіраванец.

У 2011–2020 гадах працаваў у Гродзенскім аблвыканкаме, дзе ўзначальваў упраўленне культуры, а затым — ідэалагічнай работы і па справах моладзі. У сакавіку 20-га прызначаны кіраўніком Свіслацкага райвыканкама (Гродзенская вобласць).

Адзначыўся адкрытай падтрымкай рэпрэсій у Беларусі. У прыватнасці, на нарадзе ў раённым РАУС 16 ліпеня ён заявіў: “Хачу падзякаваць вам за зладжаную працу, у тым ліку ў 2020 годзе. Ёсць такі дэвіз: “Не забудзем, не даруем”. Мы не можам дараваць тым людзям, якія хацелі тады нашу краіну перавярнуць. Праца праваахоўных органаў у гэтым кірунку ідзе планамерна па гэты дзень — не спыняйцеся! Вытрымаем — захаваем мірнае неба над галавой” (цытата паводле сайта дзяржаўнай “Лідскай газеты“).

Варта адзначыць, што згаданы версоцкім дэвіз актыўна выкарыстоўваўся падчас пратэстаў 2020 года іх удзельнікамі ў дачыненні да сілавікоў, якія ўжывалі катаванні і здзекі.

Афіцыйны Мінск падтрымлівае Маскву ў развязанай ёю 24 лютага 2022 года поўнамаштабнай вайне супраць Украіны.