12 жніўня, Позірк. Цяперашняя стаўка рэфінансавання — 9,75% гадавых — “на гэты момант з’яўляецца актуальнай і адлюстроўвае наяўны стан”, заявіў старшыня праўлення Нацыянальнага банка Раман Галоўчанка 12 жніўня па выніках сустрэчы з Аляксандрам Лукашэнкам.
“Мы не назіраем цяпер сімптомаў таго, што тыя ж інфляцыйныя працэсы ў краіне з’яўляюцца прамым следствам нейкіх манетарных фактараў, — цытуюць дзяржаўныя СМІ кіраўніка рэгулятара. — Так, інфляцыя на гэты момант крыху вышэй, чым была летась, але на яе ўплываюць вельмі розныя фактары: ад шокавых, звязаных з цэнамі на пэўныя тавары і сыравіну, так і ў цэлым міжнародныя праблемы або працэсы чыняць уплыў”.
“Гэта значыць, роля чыста манетарных фактараў не з’яўляецца вызначальнай, таму ў гэты момант мы не бачым прычын да пастрожвання грашова-крэдытнай палітыкі”, — дадаў Галоўчанка.
Падвысіць стаўку рэфінансавання з 9,5 да 9,75% гадавых было вырашана 23 чэрвеня па выніках пасяджэння праўлення Нацбанка, прысвечанага развіццю сітуацыі ў эканоміцы і грашова-крэдытнай сферы. Прэс-служба рэгулятара абгрунтавала гэтае рашэнне рызыкамі праз тое, што “складваецца высокая траекторыя інфляцыі”, звязала яго са “стымуляваннем інвестыцыйнай актыўнасці”.
Старшы навуковы супрацоўнік даследчага цэнтра BEROC Анатоль Харытончык на брыфінгу 25 чэрвеня назваў такі крок эканамічна абгрунтаваным, але “моцна запозненым” захадам.
На яго думку, рашэнне Нацбанка “адпавядае існай сітуацыі ў эканоміцы, у прыватнасці, яе перагрэву, інфляцыйнаму ціску”, але яно “павінна было прымацца яшчэ ў другой палове 2023 года”.
Эксперт звярнуў увагу на нязначнасць змены стаўкі, адзначыўшы, што такое падвышэнне “носіць абсалютна сімвалічны характар”, бо з улікам інфляцыі стаўка ў рэальным выражэнні “нават знізілася”.
“Непрадказальная і супярэчлівая манетарная палітыка можа весці да падвышэння ўзроўню інэрцыйнасці інфляцыйных чаканняў, ускладнення інвестыцыйнага планавання і прагназавання, што спараджае рызыкі яшчэ большага зніжэння эфектыўнасці грашова-крэдытнага рэгулявання”, — сказаў Харытончык.
