Масава скасоўваюцца аўтобусныя рэйсы паміж Мінскам і Вільнюсам
Вільнюскі аўтавакзал
12 жніўня, Позірк. Дзяржаўнае прадпрыемства “Мінсктранс” з 14 жніўня “да атрымання неабходных дазвольных дакументаў” прыпыняе выкананне асобных рэйсаў з беларускай сталіцы ў літоўскую і назад, паведамляецца ў тэлеграм-канале перавозчыка.
Гаворка пра рэйсы з Мінска — у 1:50, 10:20 і 12:00, а таксама з Вільнюса — у 8:00, 17:30 і 18:00.
Адзначаецца, што “па магчымасці раней набытыя квіткі будуць перааформленыя на іншыя даступныя рэйсы або будзе забяспечанае вяртанне іх поўнага кошту”.
Раней беларускі навінавы транспартна-лагістычны партал Infotrans Media Belarus паведаміў, што перавозчык Eurolines скасаваў 10 іншых рэйсаў паміж беларускай і літоўскай сталіцамі.
Пасля навіны ад “Мінсктранса” згаданы партал адзначыў, што скасаванне столькіх рэйсаў “можа прывесці да калапсу ў летні сезон адпачынкаў, калі многія беларусы імкнуцца з’ездзіць на адпачынак на мора ў Еўропу”.
“Як паведамляюць асобныя перавозчыкі рэйсавых аўтобусаў, у некаторых заканчваецца дазвол у верасні-кастрычніку, у іншых — напрыканцы года. Ці будзе ён падоўжаны, незразумела. Літоўскі бок даўно хацеў зменшыць пасажырапаток рэйсавых аўтобусаў на Вільнюс. Сітуацыя можа стаць крытычнай, калі далей будуць скасаванні рэйсаў у іншых рэйсавых перавозчыкаў”, — гаворыцца ў матэрыяле. Партал нагадаў, што рэйсавыя перавозкі пасажыраў паміж краінамі заўсёды выконваюцца на парытэтнай аснове.
У студзені 2024 года Адміністрацыя транспартнай бяспекі Літвы (АТБЛ) паведамляла, што пасля праверкі ў Вільнюсе двух пасажырскіх аўтобусаў, зарэгістраваных у Беларусі, было высветлена, што кіроўцы не мелі неабходных дазволаў на паездку.
Удакладнялася, што “пасажыры аўтобуса былі высаджаныя і самастойна дабраліся да аўтавакзала Вільнюса, а на кіроўцу складзены пратакол аб адміністрацыйным правапарушэнні і накладзены штраф у памеры 2.500 еўра”.
Паводле інфармацыі ведамства на той момант, з ліпеня 2023 года АТБЛ “праверыла 47 зарэгістраваных у Беларусі аўтобусаў, якія ажыццяўлялі рэгулярныя і чартарныя пасажырскія перавозкі паміж Беларуссю і Літвой”.
“Пасля праверак амаль ва ўсіх аўтобусах зафіксаваныя парушэнні. У 24 выпадках кампаніі-перавозчыкі не мелі дазволу на праезд. У 25 былі знойдзеныя парушэнні рэжыму кіравання і адпачынку”, — гаварылася ў рэлізе.
Паводле слоў дырэктара АТБЛ Генюса Лукашуса, беларускія перавозчыкі “маніпулююць відамі пасажырскіх перавозак”, што з’яўляецца “грубым парушэннем” пагаднення паміж урадамі Літвы і Беларусі аб міжнародных аўтамабільных перавозках ад 30 чэрвеня 1993 года.
“Рэйс афармляецца як чартарны, але пры праверцы аказваецца, што гэта рэгулярныя зносіны, што з’яўляецца парушэннем. Таксама <…> група людзей афармляецца як экскурсія, але назад у Беларусь вяртаецца толькі частка пасажыраў, — заявіў Лукашус. — У мінулым [2023] годзе беларускія перавозчыкі былі вызначаныя як тыя, хто прадстаўляе вялікую рызыку, таму АТБЛ увесь час правярае іх адпаведнасць патрабаванням. Колькасць парушэнняў не змяншаецца, таму ў будучым колькасць праверак будзе толькі павялічвацца”.
Ведамства ўдакладніла, што за парушэнні, якія дапускаюцца, накладаецца штраф — ад 2,5 да 3 тыс. еўра. За паўторнае парушэнне сума павялічыцца — ад 3 да 3,5 тыс. еўра.
