У “Трасцянцы” пахавана не менш як 546 тыс. чалавек — у 2,6 раза больш, чым лічылася раней, вынікае з даных Генпракуратуры

12 жніўня, Позірк. У нацысцкім лагеры смерці “Трасцянец” пад Мінскам, які існаваў падчас акупацыі Беларусі, пахавана не менш як 546 тыс. чалавек, заявіла Генеральная пракуратура, падводзячы вынікі ініцыяванай ведамствам “актуалізацыі звестак”.

Раней лічылася, што на тэрыторыі лагера (урочышча “Благоўшчына”, “Шашкоўка”, паблізу вёскі Малы Трасцянец) пахавана 206,5 тыс. чалавек. Такім чынам, колькасць вырасла больш як у 2,6 раза.

На патрабаванне Генпракуратуры органы выканаўчай улады склалі “адзіны пашпарт пахавання (уліковы нумар 5838), звесткі пра якое ўнесеныя Міністэрствам абароны ў аўтаматызаваны банк даных “Кніга Памяці Рэспублікі Беларусь”, што мае адкрыты доступ у сетцы Інтэрнэт”.

“Акрамя таго, у мэтах захавання гістарычнай памяці Генеральнай пракуратурай запатрабавана забяспечыць давядзенне да грамадскасці, у тым ліку моладзі, поўнай і дакладнай інфармацыі пра рэальныя маштабы трагедыі і наступствы генацыду беларускага народа”, — гаворыцца ў паведамленні.

У 2021 годзе быў прыняты закон “Аб генацыдзе беларускага народа”. Пры гэтым пад беларускім народам “для мэтаў гэтага закона разумеюцца савецкія грамадзяне, якія пражывалі на тэрыторыі Беларускай Савецкай Сацыялістычнай Рэспублікі ў перыяд Вялікай Айчыннай вайны і (або) пасляваенны перыяд” (да 31 снежня 1951 года).

За “адмаўленне генацыду беларускага народа” арт. 130² КК прадугледжвае адказнасць у выглядзе 5 гадоў зняволення, за паўторнае парушэнне закона — ад 3 да 10 гадоў пазбаўлення волі.

17 ліпеня 2023 года Аляксандр Лукашэнка падпісаў закон “Аб змене Крымінальна-працэсуальнага кодэкса”, які дазваляе пераследваць памерлых у крымінальным парадку. З таго часу ў Беларусі было праведзена некалькі судовых працэсаў у дачыненні да даўно памерлых ваенных злачынцаў.

Незалежныя гісторыкі і эксперты лічаць, што ўлады выкарыстоўваюць гэтую тэму для дыскрэдытацыі апанентаў. Пра гэта, у прыватнасці, сведчыць змест кнігі “Генацыд беларускага народа”, якая выйшла пад рэдакцыяй генеральнага пракурора Андрэя Шведа. У ёй сцвярджаецца, што масавыя пратэсты супраць фальсіфікацыі вынікаў прэзідэнцкіх выбараў 2020 года з’яўляюцца спробай дзяржаўнага перавароту з выкарыстаннем нацысцкай ідэалогіі. Акрамя таго, да генацыду фактычна прыраўнаваны антысавецкі супраціў у першыя пасляваенныя гады.