Лукашэнка спадзяецца на “ўмацаванне гандлёвых сувязяў” з Эквадорам

10 жніўня, Позірк. “Актывізацыю палітычнага дыялогу паміж Мінскам і Кіта” адзначыў Аляксандр Лукашэнка, віншуючы 10 жніўня прэзідэнта Эквадора Даніэля Нобоа з нацыянальным святам — Днём абвяшчэння незалежнасці.

Таксама віншавальнік, як паведамляе яго прэс-служба, “пацвердзіў намер трымаць курс на раскрыццё багатага патэнцыялу беларуска-эквадорскіх адносін”.

“Упэўнены, што ўзаемадапаўняльнасць эканомік і імкненне нашых дзяржаў да іх дыверсіфікацыі шляхам развіцця новых галін і ўмацавання гандлёвых сувязяў дазволяць нам істотна павялічыць двухбаковы тавараабарот”, — заявіў Лукашэнка.

Эквадор, паводле яго слоў, можа разлічваць на Беларусь як на “стабільнага і надзейнага партнёра ў самым цэнтры Еўропы не толькі ў палітычнай і гандлёва-эканамічнай сферах”, але і ў “пытаннях навукова-тэхнічнага і гуманітарнага супрацоўніцтва”.

Дыпламатычныя адносіны паміж Беларуссю і Эквадорам устаноўленыя ў 1993 годзе. Дыпламатычнае прадстаўніцтва ў гэтай паўднёваамерыканскай краіне ажыццяўляе па сумяшчальніцтве амбасада Беларусі ў Калумбіі.

Лукашэнка наведваў Эквадор у 2012 годзе.

Паводле звестак МЗС, у 2020 годзе (больш позняя інфармацыя адсутнічае) беларуска-эквадорскі тавараабарот склаў 207 млн долараў — на 2% больш, чым у 2019-м. Экспарт Беларусі склаўся на ўзроўні 22,2 млн, імпарт — 184,8 млн.

Беларусь у 2020-м пастаўляла ў Эквадор калійныя і азотныя ўгнаенні, скручаны дрот з чорных металаў, нафтапрадукты, друкаваныя кнігі і брашуры.

14 лютага 2025 года Нобоа павіншаваў Лукашэнку з “перамогай на выбарах”.