9 жніўня не толькі пачатак супраціву, але і дзень нараджэння Ларысы Геніюш, якая прайшла сталінскія лагеры — Баркоўскі

9 жніўня, Позірк. Людзі, якія сабраліся 9 жніўня на вулічную акцыю ў Варшаве з нагоды пятай гадавіны прэзідэнцкіх выбараў-2020 у Беларусі, “не проста прыйшлі адзначыць сімвалічную дату”, гэтая дата “кажа, што мы працягваем сваё змаганне і не лічым, што ўсё было дарэмна, што мы прайгралі”. Пра гэта заявіў в.а. прадстаўніка Аб’яднанага пераходнага кабінета (АПК) па нацыянальным адраджэнні Павел Баркоўскі.

Ён адзначыў, што 9 жніўня — гэта не толькі дата пачатку беларускага супраціву, а яшчэ і дзень нараджэння выбітнай беларускай паэтэсы Ларысы Геніюш, якая прайшла сталінскія лагеры і ў гонар якой была названа адна з узнагарод АПК — медаль Няскораных. Яе даюць палітзняволеным, якія выходзяць з-за кратаў.

Спікер Каардынацыйнай рады (КР) Арцём Брухан у сваёй прамове на мітынгу выказаў меркаванне, што ідэя дэмакратычнай Беларусі жыве і 9 жніўня ў Варшаве і іншых гарадах сабраліся беларусы — носьбіты гэтай ідэі.

“Гэтыя людзі працягваюць барацьбу штодзённа, нягледзячы на тое, што можа здарыцца з імі, з іх роднымі і блізкімі, нягледзячы на тое, што беларуская прапаганда заклікае іх здацца, стаць на калені”, — сказаў Брухан.

“Але барацьба трывае, а зараз на парадку дня знаходзіцца пабудова не толькі дэмакратычнай, але і незалежнай Беларусі, і гэта дае нам сілы”, — лічыць спікер КР. Ён заклікаў прысутных “працягваць гэтую барацьбу да самой перамогі”.