Прэзідэнт Парламенцкай асамблеі НАТО: Мы ўшаноўваем незвычайную стойкасць беларускага народа
9 жніўня, Позірк. “Сёння мы ўшаноўваем незвычайную стойкасць і рашучасць беларускага народа і яго прадстаўнікоў у выгнанні, якія працягваюць ствараць альтэрнатыўныя інстытуты, рыхтавацца да дэмакратычных пераўтварэнняў, падтрымліваць Украіну ў яе барацьбе супраць агрэсіі Расіі і саўдзелу беларускага рэжыму, а таксама выступаць за будучыню сваёй краіны ў складзе еўрапейскай сям’і“, — такую заяву зрабіў прэзідэнт Парламенцкай асамблеі НАТО Маркас Перастрэла з нагоды пятай гадавіны прэзідэнцкіх выбараў 2020 года ў Беларусі.
Перастрэла падкрэсліў, што пяць гадоў таму беларускі народ пратэставаў супраць фальсіфікацыі выбараў і сутыкнуўся з жорсткім прыгнётам і ўмацаваннем аўтарытарнага кіравання Аляксандра Лукашэнкі, гэтыя падзеі “вымусілі законных лідараў краіны сысці ў выгнанне“, але таксама ініцыявалі барацьбу за свабоду.
Паводле слоў прэзідэнта ПА НАТО, з тых часоў Святлана Ціханоўская кожны дзень дэманструе прыхільнасць справе дэмакратычнай Беларусі, пастаянную сілу і адзінства гэтага руху.
Перастрэла падкрэсліў, што нядаўняе вызваленне яе мужа, блогера Сяргея Ціханоўскага пасля пяці гадоў зняволення з палітычных матываў — “яркі напамін пра тое, чаго можна дасягнуць дзякуючы міжнароднай салідарнасці і пастаяннаму ціску“.
“Аднак многія іншыя палітвязні па-ранейшаму знаходзяцца за кратамі, і мы заклікаем да іх неадкладнага вызвалення“, — адзначыў прэзідэнт ПА НАТО.
Ён падкрэсліў, што падтрымка дэмакратычнай Беларусі з’яўляецца як маральным імператывам, так і стратэгічным унёскам у бяспеку Еўропы.
Парламенцкая асамблея НАТО “ніколі не адступіць ад сваёй цвёрдай пазіцыі ў падтрымцы тых, хто змагаецца за свабодную, суверэнную і дэмакратычную Беларусь“, заявіў Перастрэла.
9 жніўня 2020 года — дзень прэзідэнцкіх выбараў, у якіх Аляксандр Лукашэнка, паводле афіцыйных даных, набраў каля 80%, а яго асноўны супернік Святлана Ціханоўская — 10%. У выніку па ўсёй краіне пачаліся масавыя пратэсты, якія шляхам рэпрэсій ўрэшце рэшт былі задушаныя. Арышты і суды працягваюцца дагэтуль. Перыядычна з санкцыі Лукашэнкі ў рамках палітычнага гандлю з Захадам датэрмінова выпускаюцца на свабоду невялікія групы зняволеных; апошняя — 21 чэрвеня 2025 года пасля візіту ў Мінск амерыканскай дэлегацыі на чале са спецпрадстаўніком прэзідэнта ЗША Дональда Трампа па Украіне Кітам Келагам. Сярод вызваленых быў Сяргей Ціханоўскі.
