Супрацоўнікі МУС збіраюць генетычны матэрыял сваякоў палітэмігрантаў — праваабаронцы

8 жніўня, Позірк. Пра збор супрацоўнікамі Міністэрства ўнутраных спраў “генетычнага матэрыялу (сліны)” сваякоў палітэмігрантаў паведамляе праваабарончы тэлеграм-канал MAYDAY.TEAM.

Паводле звестак праваабаронцаў, за “апошнія два тыдні” ў Магілёўскай вобласці зафіксавана некалькі падобных выпадкаў. Гаворка пра сваякоў “актывістаў і былых палітвязняў, якія з’ехалі з краіны”.

“Прычынай называюць фарміраванне базы звестак ДНК, каб у выпадку неабходнасці людзей за мяжой “можна было апазнаць”. Аднак сапраўдныя матывы супрацоўнікаў РАУС і РУУС не ясныя”, — гаворыцца ў паведамленні.

“Каманда MAYDAY атрымала пацверджанне, што такая практыка існуе ў розных гарадах Беларусі”, — адзначаюць праваабаронцы.

Беларускія ўлады рэгулярна пагражаюць палітэмігрантам пераследам, а таксама рэпрэсіямі ў дачыненні да сваякоў.

5 жніўня Следчы камітэт заявіў, што ідэнтыфікавана “яшчэ 207 чалавек”, якія сёлета бралі ўдзел у святкаванні Дня Волі ў Польшчы, ЗША, Літве, Канадзе і Вялікабрытаніі — “нягледзячы на спробу выкарыстання сродкаў і метадаў канспірацыі”.

Сцвярджалася, што асноўная мэта правядзення вулічных акцый за мяжой — “спроба дыскрэдытацыі Рэспублікі Беларусь на міжнароднай арэне, распальванне сацыяльнай варожасці і варажнечы, імітацыя падтрымкі лідараў радыкальных рухаў, прыцягненне фінансавання да існуючых ініцыятыў”.

“Падчас расследавання крымінальнай справы ўстаноўленыя аб’екты ўласнасці фігурантаў на тэрыторыі Рэспублікі Беларусь. Вынесеныя пастановы аб правядзенні ператрусаў і накладанні арышту на маёмасць. Разглядаецца пытанне аб прымяненні механізму спецыяльнай вытворчасці”, — заявіў прадстаўнік ведамства.

Усе “ўстаноўленыя асобы” прызнаныя падазраванымі па крымінальнай справе за здзяйсненне злачынства, прадугледжанага ч. 2 арт. 3614 КК (садзейнічанне экстрэмісцкай дзейнасці).

СК таксама прыгразіў, што “кожны” ўдзельнік вулічных акцый за мяжой “панясе ўстаноўленую законам адказнасць”.

6 жніўня праваабарончы цэнтр “Вясна” апублікаваў фрагмент пастановы СК аб узбуджэнні крымінальнай справы паводле ч. 3 арт. 361 КК у дачыненні да кіраўніка Аб’яднанага пераходнага кабінета (АПК) Святланы Ціханоўскай, яе намесніка ў АПК Паўла Латушкі, а таксама “іншых неўстаноўленых асоб”.

У тым жа дакуменце гаворыцца аб узбуджэнні крымінальнай справы паводле арт. 3614 КК у дачыненні да “неўстаноўленых асоб”.

Паводле звестак праваабаронцаў, гэтыя справы звязаныя з удзелам беларусаў у акцыях салідарнасці, якія раней адбыліся за мяжой.

Арт. 361 КК тычыцца “заклікаў да захадаў абмежавальнага характару (санкцый), іншых дзеянняў, накіраваных на прычыненне шкоды нацбяспецы Беларусі”.

Праваабаронцы заклікалі грамадзян, якія знаходзяцца ў краіне і ўдзельнічалі ў такіх акцыях, паклапаціцца пра сваю бяспеку, звярнуць увагу на свае публікацыі ў сацсетках, не захоўваць на тэлефонах фотаздымкі, якія ўяўляюць небяспеку. Акрамя таго, яны просяць паведамляць ім пра факты палітычнага пераследу за ўдзел у акцыях салідарнасці за мяжой.

Чарговыя акцыі беларусаў за мяжой пройдуць 9 жніўня і будуць прымеркаваныя да пяцігоддзя прэзідэнцкіх выбараў 2020 года.