Ад пачатку жніўня на аб’ектах аграпрамысловага комплексу адбылося сем пажараў

6 жніўня, Позірк. Ад пачатку жніўня на аб’ектах аграпрамысловага комплексу адбылося сем пажараў, сведчыць праведзены “Позіркам” маніторынг даных Міністэрства па надзвычайных сітуацыях.

Апошні выпадак зафіксаваны ўдзень 6 жніўня — пажар здарыўся ў будынку птушніка ў аграгарадку Камунар (Буда-Кашалёўскі раён Гомельскай вобласці). Птушак унутры не было.

1 жніўня паведамлялася пра ўзгаранне ў зернесушыльным комплексе на тэрыторыі малочнатаварнай фермы ля вёскі Нівы (Жлобінскі раён Гомельскай вобласці). Агонь пашкодзіў металічную ашалёўку бункера сушыльнай шахты на плошчы 6 кв. м.

Два здарэнні зафіксаваныя 3 жніўня: у мабільным зернесушыльным комплексе Mecmar SSI25/210T2 ля вёскі Перамонт (Лёзненскі раён Віцебскай вобласці) пашкоджана 10 тон яравога ячменю, шчыт кіравання, бункер і кола зернесушылкі; у полі ля вёскі Навасёлкі (Кобрынскі раён Брэсцкай вобласці) знішчана 3 гектары пасеваў яравога ячменю.

На наступны дзень супрацоўнікі МНС тушылі пажар у зернесушыльным комплексе ля вёскі Вежы (Слуцкі раён Мінскай вобласці), дзе агонь пашкодзіў паўтоны насення рапсу, а таксама ўзгаранні — трыцікале ў полі ля вёскі Новая Ёлча (Брагінскі раён Гомельскай вобласці), знішчана 9 га пасеваў; азімага жыта ў полі ля аграгарадка Рубяжэвічы (Стаўбцоўскі раён Мінскай вобласці), 0,002 га.

Напрыканцы ліпеня на аб’ектах АПК здарылася восем пажараў — знішчаныя аўтамабіль, сена ў рулонах, рапс у сушылцы.

Раней “Позірк” паведамляў, што 23 ліпеня на тэрыторыі мехдвара ў аграгарадку Гняздзілава (Докшыцкі раён Віцебскай вобласці) пажар знішчыў аўтамабіль УАЗ (2022 года выпуску), пашкодзіў 80 кв. м шыфернага даху і маёмасць у будынку.

Ад пачатку 2025 года на аб’ектах АПК ужо знішчана або пашкоджана агнём 17 адзінак тэхнікі (у 2024-м — мінімум 73), паказаў праведзены “Позіркам” агляд паведамленняў МНС.

За пяць гадоў у Беларусі істотна зменшылася колькасць асноўных відаў тэхнікі, машын і абсталявання ў сельскагаспадарчых арганізацыях, вынікае з праведзенага “Позіркам” аналізу даных Нацыянальнага статыстычнага камітэта.

Стала менш камбайнаў: збожжаўборачных — на 14,6% (з 8.798 на канец 2019 года да 7.514 на канец 2024-га), бульбаўборачных — на 32,9% (з 778 да 522), буракаўборачных — на 27,5% (з 298 да 216), кормаўборачных — на 11,6% (з 4.138 да 3.660), ільноўборачных — на 30,1% (з 428 да 299).

Колькасць трактароў у гаспадарках зменшылася на 9,6% (з 38.966 да 35.241), грузавых аўтамабіляў — на 14,8% (з 17.873 да 15.228).

Даільных установак і агрэгатаў стала менш на 15,4% (з 10.758 да 9.096), бульбакапальнікаў — на 35,3% (з 1.254 да 811), бульбасаджалак — на 28% (з 1.198 да 862), зернеачышчальных машын — на 12,7% (з 6.939 да 6.059), зернеачышчальна-сушыльных комплексаў — на 19,6% (з 2.559 да 2.057).