Парушэнні ліцэнзійных патрабаванняў устаноўлены амаль на ўсіх палігонах ТКА

5 жніўня, Позірк. На 142 (97% ад усіх) палігонах цвёрдых камунальных адходаў (ТКА) прысутнічаюць парушэнні ліцэнзійных патрабаванняў, паведаміла прэс-служба Мінпрыроды па выніках нарады з удзелам міністра Сяргея Масляка.

Па стане на 1 ліпеня ў Беларусі налічваецца 146 аб’ектаў пахавання камунальных адходаў: у Брэсцкай вобласці — 22 палігоны, Віцебскай — 27, Гомельскай — 25, Гродзенскай — 19 палігонаў, Мінскай — 31, Магілёўскай —21, у Мінску — адзін.

Тыповым парушэннем названа незахаванне зацверджанага тэхналагічнага рэгламенту пахавання адходаў.

Для ўстаранення выяўленых парушэнняў у адрас прадпрыемстваў-уласнікаў палігонаў ТКА было накіравана 120 прадпісанняў аб устараненні ліцэнзіятам парушэнняў заканадаўства аб ліцэнзаванні, у тым ліку 108 прадпісанняў з тэрмінам выканання да 1 ліпеня.

Большасць прадпрысанняў (87; 81%) не выканана ў тэрмін, што “з’яўляецца падставай для прыпынення дзеяння ліцэнзіі тэрмінам да шасці месяцаў”.

У лютым Масляк паведамляў, што ўзровень выкарыстання камунальных адходаў дасягнуў 38, 4%.

“Як і ў іншых развітых краінах, адходаў утвараецца шмат: больш за 50 млн тон ад вытворчасці і каля 4 млн тон цвёрдых камунальных адходаў у год”, — сказаў чыноўнік.

Нацыянальнай стратэгіяй развіцця эканомікі замкнутага цыкла (цыркулярнай эканомікі) прадугледжваецца павелічэнне ўзроўню выкарыстання цвёрдых камунальных адходаў да 90 працэнтаў ад іх агульнага аб’ёму ў 2035 годзе.