Лукашэнка заклікаў грамадзян Швейцарыі пераканацца, што ў Беларусі камфортна і бяспечна

1 жніўня, Позірк. У Беларусі “заўсёды рады вітаць грамадзян Швейцарыі, якія могуць наведаць нашу краіну ў любы час без візы і асабіста пераканацца ў тым, што ў нас камфортна і бяспечна“, заявіў Аляксандр Лукашэнка, віншуючы 1 жніўня швейцарскі народ з нацыянальным святам — Днём заснавання Канфедэрацыі.

Паводле інфармацыі прэс-службы віншавальніка, ён таксама заявіў, што “Беларусь, як і Швейцарыя, надае выключнае значэнне ўмацаванню незалежнасці і сацыяльнай справядлівасці“. Абодва народы “імкнуцца да вырашэння самых складаных пытанняў шляхам дыялогу і кампрамісаў, забеспячэння мірнага суіснавання розных моў, культур і канфесій“.

Лукашэнка таксама адзначыў, што “дзякуючы закладзенаму ў мінулыя гады трываламу падмурку беларусы і швейцарцы маюць выдатны патэнцыял для пашырэння двухбаковых сувязяў у розных галінах на прынцыпах раўнапраўя і ўзаемнай павагі”.

5 красавіка амбасадар Беларусі ў Швейцарыі Аляксандр Ганевіч у інтэрв’ю расійскаму прапагандысцкаму агенцтву РІА “Новости“ заявіў, што двухбаковае супрацоўніцтва прыпыненае, але Мінск не зацікаўлены ў доўгатэрміновай замарозцы адносін.

“Мы заклікаем нашых контрагентаў не гнацца за палітычнай кан’юнктурай, адмовіцца ад бяздумнага капіявання санкцый ЕС з прыцэлам перш за ўсё на доўгатэрміновыя перспектывы супрацоўніцтва. Такі падыход мог бы стаць першым крокам у напрамку актывізацыі двухбаковага дыялогу”, — сказаў Ганевіч.

На думку дыпламата, міжнародная сітуацыя развіваецца “дынамічна і часам непрадказальна“, таму абедзвюм краінам трэба быць гатовымі да перазагрузкі стасункаў, “каб не шкадаваць пра страчаны час і магчымасці”.

“Зыходзім з таго, што здаровы сэнс у канчатковым выніку возьме верх. Упэўнены, што ўзніклая ў Еўрасаюзе і падхопленая Швейцарыяй эйфарыя з нагоды магчымасці нанясення нейкага непрымальнага эканамічнага ўрону Саюзнай дзяржаве Беларусі і Расіі непазбежна зменіцца працверажэннем і разуменнем неабходнасці вяртання да прымальнага ўзроўню супрацоўніцтва“, — заявіў амбасадар.

Беларусь, паводле яго слоў, працягвае весці “няпросты дыялог” з уладамі Швейцарыі. Нагадаўшы, што ў Беларусі і Швейцарыі працуюць амбасады абедзвюх краін, ён канстатаваў, што “інтэнсіўнасць і ўзровень афіцыйных кантактаў у апошнія гады <…> істотна знізіліся“. “Асобныя напрамкі беларуска-швейцарскага двухбаковага супрацоўніцтва на цяперашнім этапе фактычна пастаўлены на паўзу. Натуральна, гэта адбылося не з ініцыятывы беларускага боку“, — заявіў Ганевіч, не згадаўшы першапрычыны далучэння Швейцарыі да санкцый Еўрасаюза і ўвядзення ёю ўласных абмежавальных мер.

Нягледзячы на “складанасці двухбаковага дыялогу“ і “часцяком дыяметральна супрацьлеглыя пазіцыі“ па шэрагу пытанняў, прадстаўнік Мінска аддаў належнае “прафесіяналізму швейцарскіх дыпламатаў, іх стрыманай і ўважлівай манеры стасункаў”.

“У адрозненне ад многіх іншых краін, Швейцарыя займае больш узважаную і прагматычную пазіцыю па Беларусі, дзякуючы чаму мы захоўваем каналы для двухбаковага дыялогу, [гэта] дазваляе лепш разумець нюанс падыходаў процілеглага боку“, — сказаў Ганевіч.

Швейцарыя традыцыйна далучаецца да санкцый Еўрапейскага саюза ў дачыненні да Беларусі, за што ўключаная Мінскам у спіс “недружалюбных дзяржаў“.

У той жа час яна з’яўляецца адной з нямногіх еўрапейскіх краін, якая на фоне рэпрэсій, што развярнуліся ў Беларусі, даслала ў Мінск дыпламата ўзроўню амбасадара — у 2022 годзе (член Еўрасаюза Венгрыя зрабіла гэта ў 2023-м, Славакія — у 2025-м, кандыдат на ўступленне ў ЕС Сербія — у 2024-м). Неўзабаве пасля ўручэння Крысцінай Хонегер-Залатухін у лютым 2022 года копій даверчых грамат была вызвалена асуджаная з палітычных матываў грамадзянка Швейцарыі беларускага паходжання Наталля Хершэ.

Грамадзяне Швейцарыі могуць наведваць Беларусь без віз з 19 ліпеня 2024 года.