АМАП затрымлівае жыхароў сталіцы ля месца падзення беспілотніка ў Фрунзенскім раёне — праваабаронцы
29 ліпеня, Позірк. Супрацоўнікі АМАП затрымліваюць жыхароў сталіцы ля месца падзення беспілотніка ў раёне дома №72 на вул. Матусевіча ў Фрунзенскім раёне Мінска, паведамляе праваабарончы цэнтр “Вясна” са спасылкай на ўласныя крыніцы.
Паводле інфармацыі праваабаронцаў, на месцы здарэння знаходзіцца вялікая колькасць сілавікоў, якія, верагодна, шукаюць тых, хто перадаваў інфармацыю пра інцыдэнт у незалежныя медыя.
Пра інцыдэнт са спасылкай на відавочцаў паведаміў партал “Люстэрка”. Было заяўлена, што каля 2:00 29 ліпеня дрон урэзаўся ў дом у Фрунзенскім раёне сталіцы, упаў на прыпаркаваны аўтамабіль і выбухнуў. Медыя адзначыла, што мае відэазапіс крушэння беспілотніка.
Прыкладна праз гадзіну пасля з’яўлення інфармацыі ў СМІ Міністэрства абароны прызнала факт падзення беспілотніка.
“Дзяжурнымі сіламі па СПА каля 2 гадзін ночы 29 ліпеня ў паветранай прасторы Рэспублікі Беларусь быў выяўлены і спынены палёт неапазнанай паветранай цэлі — парушальніка парадку выкарыстання паветранай прасторы, ідэнтыфікаванай як БЛА, — гаварылася ў паведамленні ваеннага ведамства. — У выніку ўздзеяння на яго сродкаў радыёэлектроннай барацьбы 02:33 БЛА ўпаў у раёне дома 72 па вул. Матусевіча г. Мінска”.
Адзначалася, што пацярпелых няма; праводзіцца праверка. З улікам здарэння “аператыўна робяцца дадатковыя захады па ўзмацненні кантролю за выкарыстаннем паветранай прасторы”.
“Кіраўнік дзяржавы трымае сітуацыю на асабістым кантролі”, — заявіла Мінабароны.
У кастрычніку 2024 года супрацоўнікі Камітэта дзяржаўнай бяспекі затрымалі жыхарку Калінкавічаў (Гомельская вобласць) за супрацу з “экстрэмісцкімі рэсурсамі”, якое заключалася ў перадачы “інфармацыі, фота- і відэаматэрыялаў адміністратарам дэструктыўных тэлеграм-каналаў”.
Як бачна на апублікаваным відэа, сілавікі ўварваліся ў дом, з якога напярэдадні было знята відэа падзення непадалёк беспілотнага лятучага апарата.
Пры гэтым, паводле інфармацыі рэгіянальнага медыя “Флагшток”, гэтае відэа не перадавалася “дэструктыўным” рэсурсам, а было апублікаванае ў мясцовым чаце дарожнай дапамогі “Калінкавічы, Аўта, ДАІ”. Пасля відэаролік апублікавалі незалежныя медыя.
На відэа чутны гук матора, як мяркуецца, дрона, што падаў, затым бачная яркая ўспышка, раздаецца гук выбуху, пасля чаго на вуліцы знікае святло.
Паведамлялася, што ў ноч на 3 кастрычніка на тэрыторыю Беларусі ў чарговы раз заляцеў расійскі БПЛА, паводле непацверджанай на той момант інфармацыі, дрон іранскай маркі “Шахед” мог упасці ў Калінкавічах.
Беларускія ўлады ніяк не каментавалі інцыдэнт. Не было згадкі пра яго і ў паведамленні пра затрыманне жыхаркі Калінкавічаў.
Ціханоўская пра падзенне дрона ў Мінску: Рэжыму важней трымаць грамадзян пад кантролем, чым клапаціцца пра іх бяспеку
29 ліпеня, Позірк. Для рэжыму Аляксандра Лукашэнкі "куды важней трымаць грамадзян пад кантролем, чым клапаціцца пра іх здароўе ды бяспеку", такім чынам беларускі дэмакратычны лідар Святлана Ціханоўская пракаментавала сітуацыю з падзеннем дрона ў Мінску. "Гэтай ноччу ў Мінску быў збіты …
