Па справе “Беларускага Гаюна” затрымана мінімум 33 чалавекі — “Вясна”

28 ліпеня, Позірк. У Беларусі працягваюцца затрыманні па крымінальнай справе за перадачу інфармацыі праекту “Беларускі Гаюн”, паведамляе праваабарончы цэнтр “Вясна”.

Паводле звестак праваабаронцаў, пад варту ўзята не менш за 33 чалавекі, прайшло не менш за шэсць судовых працэсаў.

Адзначаецца, што большасць фігурантаў — мужчыны, справы распачатыя паводле арт. 361⁴ Крымінальнага кодэкса (садзейнічанне экстрэмісцкай дзейнасці).

Праект “Беларускі Гаюн” быў заснаваны пасля поўнамаштабнага расійскага ўварвання ва Украіну ў 2022 годзе, займаўся маніторынгам вайсковай актыўнасці ў Беларусі. Спыніў працу 7 лютага 2025 года, неўзабаве пасля таго, як невядомыя атрымалі доступ да чат-бота, дзе “збіралася інфармацыя ад людзей”.

“Мы не ведаем, які аб’ём даных мог быць выгружаны за той час, пакуль у старонняга акаўнта быў доступ. Я хачу адразу сказаць, што ў гэтай сітуацыі спрацавала чалавечая памылка, і гэтая памылка была маёй”, — паведаміў заснавальнік праекта блогер Антон Матолька.

Ён папярэдзіў пра пагрозу для людзей, якія дасылалі ў бот інфармацыю. Некаторым з іх удалося эміграваць.

Аб масавых затрыманнях па справе “Беларускага Гаюна” паведамлялася 2 траўня.

У чэрвені Гродзенскі абласны суд завочна прыгаварыў Матольку да 20 гадоў пазбаўлення волі за “шэраг наўмысных злачынстваў экстрэмісцкай накіраванасці”.

20 ліпеня кіраўнік фонду салідарнасці BySol Андрэй Стрыжак (цяпер часова адхілены ад пасады) паведамляў, што ў траўні 2025 года ў брэсцкім следчым ізалятары знаходзілася каля 50 чалавек, абвінавачаных па справе “Беларускага Гаюна”.

Праваабаронцы падкрэсліваюць, што агульная колькасць затрыманых па справе значна большая, чым ім вядома.