Другі энергаблок БелАЭС праз 12 дзён пасля інцыдэнту на ім уключаны ў сетку

28 ліпеня, Позірк. Другі энергаблок Беларускай атамнай станцыі (БелАЭС) уключаны ў сетку “пасля завяршэння тэхналагічных аперацый па аднаўленні працы сістэмы ахаладжэння генератара”, паведаміла прэс-служба Міністэрства энергетыкі 28 ліпеня.

“У цяперашні час блок працуе на намінальнай магутнасці”, — гаворыцца ў рэлізе.

16 ліпеня блок быў адключаны ад сеткі. Чыннікам стала “спрацоўванне сігналізацыі аб адхіленні ў працы сістэмы астуджэння генератара”.

“Сітуацыя штатная і не ўяўляе пагрозы бяспечнай эксплуатацыі станцыі. Радыяцыйны фон на АЭС і ў зоне назірання не змяняўся. Электразабеспячэнне спажыўцоў не парушалася”, — паведамляла тады ведамства.

Праводзіліся “неабходныя дыягнастычныя мерапрыемствы для наступнага аднаўлення работы электратэхнічнага абсталявання”.

Збудаванне першай станцыі — Беларускай АЭС ля Астраўца (Гродзенская вобласць) — завяршылася восенню 2023 года. Станцыя пабудавана па расійскім праекце, пераважна за кошт крэдыту РФ, генеральным падрадчыкам выступіў “Расатам”. Першы блок сілкуе энергасістэму з 3 лістапада 2020 года, другі — з 13 траўня 2023-га, у прамысловую эксплуатацыю яны ўведзены ў чэрвені 2021-га і лістападзе 2023-га адпаведна.

3 снежня 2024 года прэс-служба БелАЭС паведамляла, што першы энергаблок станцыі выведзены ў трэці планава-папераджальны рамонт. Блок не працаваў 55 дзён.

Першы планава-папераджальны рамонт першага энергаблока АЭС быў праведзены ў 2022 годзе і заняў 198 дзён замест належных 80. Другі рамонт — у 2023 годзе — заняў 68 дзён.

24 студзеня 2025 года быў падключаны да сеткі другі энергаблок БелАЭС. Аб яго адключэнні стала вядома 19 снежня 2024 года з-за “спрацоўвання аднаго з датчыкаў”. Калі энергаблок быў адключаны ад сеткі, Міністэрства энергетыкі не паведаміла.

Другі блок АЭС рамантавалі ў 2024 годзе, працэс, паводле паведамленняў Міністэрства энергетыкі, заняў роўна 80 дзён.

Беларускія ўлады і прапаганда з моманту ідэі будаўніцтва атамнай электрастанцыі і ў наступныя гады запэўнівалі, што ўзвядзенне АЭС вельмі выгаднае для жыхароў Беларусі.

Аднак сярэдняя цана на электраэнергію (у разліку за 100 кВт⋅г) у Беларусі ў першым квартале 2025 года склала 27,34 рубля — на 8,9% больш, чым за аналагічны перыяд 2024-га (25,11), сведчыць праведзены “Позіркам” аналіз звестак Нацыянальнага статыстычнага камітэта.

У студзені — сакавіку 2023-га яна была 24,12 рубля. Такім чынам, за два гады цана вырасла на 13,3%.